مرکزاطلاعات فلسطین کے مطابق الخلیل میں فلسطینی سماجی کارکن اور یہودی توسیع پسندی کی مزاحمت کے لیے قائم عوامی کمیٹی کے کنوینئر محمد عوض نے بتایا کہ صہیونی فوجیوں نے دو فلسطینی نوجوانوں جہاد خلیل العلامی اور بلال حابس العلامی کو حراست میں لینے کے بعد نامعلوم مقام پر منتقل کر دیا ہے۔ دونوں کی عمریں 19 سال بتائی گئی ہیں۔
محمد عوض نے بتایا کہ صہیونی فوجیوں نے الخلیل کے شمالی قصبے بیت امرکے تمام داخلی اور خارجی راستے بند کر کے گھر گھر تلاشی لی۔ تلاشی کی کارروائی کےدوران دو نوجوانوں کو حراست میں لینے کے بعد نامعلوم مقام منتقل کر دیا گیا ہے۔
ادھر یہودی آباد کاروں نے بیت لحم میں فلسطینی شہریوں کے کھیتوں کی طرف جانے والے اہم راستے کو بند کر دیا۔ مقامی سماجی کارکن محمد احمد صلاح نے بتایا کہ یہودی آباد کاروں کے ایک گروپ نے اسرائیلی فوج اور پولیس کی موجودگی میں سڑک پر بھاری پتھر پھینک دیے اور جگہ جگہ خاردار تاریں لگا دیں جس کے بعد فلسطینی اپنے کھیتوں میں نہیں جا سکے۔
احمد صلاح کا کہنا تھا کہ یہودی آباد کاروں کی جانب سے زرعی زمینوں اور زیرکاشت رقبے کو ملانے والا راستہ بند کرنا فلسطینیوں کی اراضی ہتھیانے کی ایک سازش ہے۔ یہودی آباد کار اس سے قبل بھی فلسطینیوں کی کئی مقامی کالونیوں کے دیگر مقامات سے رابطے کے لیے استعمال ہونے والی سڑکیں بند کرچکے ہیں۔
بشکریہ:مرکزاطلاعات فلسطین