رام اللہ (فلسطین نیوز۔مرکز اطلاعات) صیہونی فوج نے گذشتہ شام فلسطین کے مقبوضہ مغربی کنارے کے وسطی شہر رام اللہ میں البیرہ کے مقام پر فلسطینی طلباء کی ایک ریلی پر اندھا دھند فائرنگ کی جس کے نتیجے میں کم سے کم آٹھ فلسطینی شہری زخمی ہوگئے۔
فلسطین نیوز کو موصول ہونے والی اطلاعات کے مطابق منگل کی شام صیہونی فوج کی بھاری نفری نے البیرہ کے مقام پر فلسطینی شہریوں کی ایک احتجاجی ریلی پر دھاوا بولا۔ صیہونی فوج نے نہتے فلسطینیوں پر براہ راست گولیاں چلائیں جس کے نتیجے میں آٹھ فلسطینی زخمی ہوگئے۔ زخمیوں میں سے بعض کے سروں اور جسم کے بالائی حصے میں گولیاں لگی ہیں جس کے باعث ان کی حالت تشویشناک بیان کی جاتی ہے۔عینی شاہدین نے بتایا کہ صیہونی فوج نے البیرہ کے شمالی علاقے میں فلسطینی طلباء کی ایک ریلی پر فائرنگ کی۔ فلسطینی طلباء نے بیرزیت یونیورسٹی میں طلباء یونین کے انچارج عمر الکسوانی کی گرفتاری کے خلاف احتجاجی مظاہرہ کیا۔ صیہونی فوج نے طلباء کو منتشر کرنے لیے ان پر آنسوگیس کی شیلنگ کی جس کے نتیجے میں متعدد فلسطینی بچے دم گھٹنے سے بھی متاثر ہوئے ہیں۔
اسرائیلی فوج کی طرف سے فلسطینی طلباء پر وحشیانہ تشدد کے مناظر کی ویڈیو اور تصاویر بھی سوشل میڈیا پر پوسٹ کی گئی ہیں جن میں صیہونی فوج کونہتے طلباء کو سڑکوں پر گھیسٹتے اور انہیں تشدد کرتے دیکھا جاسکتا ہے۔