نابلس – (فلسطین نیوز۔مرکز اطلاعات) فلسطین کے مقبوضہ مغربی کنارے اور بیت المقدس میں اسرائیلی فوج کی گھر گھر تلاشی کی کارروائیوں کے دوران بچوں سمیت مزید سات فلسطینیوں کو حراست میں لے لیا گیا۔
فلسطین نیوز کو موصول ہونے والی اطلاعات کے مطابق منگل کے روز علی الصباحÂ اسرائیلی فوج نے غرب اردن کے شمالی شہر نابلس کے پرانے قصبے میں تلاشی کے دوران ایک فلسطینی نوجوان کو حراست میں لیا گیا۔عینی شاہدین کے مطابق اسرائیلی فوج کی بھاری نفری جنوبی نابلس کے تاریخی قصبے کفر قلیل میں داخل ہوئی اور عزمی منصور نامی شہری کے گھر میں گھس کر اس میں توڑپھوڑ کی۔ اس دوران اسرائیلی فوج نے عزمی منصور کے بیٹےاحمد عزمی کو حراست میں لے لیا۔
ادھر غرب اردن کے شمالی شہر طولکرم میں فرعون قصبے میں تلاشی کے دوران 20 سالہ خالد الشیخ یوسف کو اس کے گھر سے حراست میں لیا گیا۔
رپورٹ کے مطابق اسرائیلی فوج نے فرعون قصبے کے تمام داخلی راستے سیل کرکے اس میں دو گھنٹے تک تلاشی کا سلسلہ جاری رکھا۔ ادھر الخلیل شہر کے شمالی قصبے بیت امر سے ایک 14 سالہ ماجد الھندی اور بیت لحم سے محمد حافظ جبرین کو حراست میں لے لیا۔
شمالی الخلیل شہر میں العروب پناہ گزین کیمپ میں تلاشی کے دوران اسرائیلی فوج نے دو سگے بھائیوں انس اور حمزہ نواورہ کو وادی شاہین سے حراست میں لے لیا جب کہ ایک سابق اسیر حمزہ کو بھی اس علاقے سے گرفتار کیا گیا۔