فلسطین نیوز کو موصول ہونے والی اطلاعات کے مطابق صیہونیوں کی جانب سے قبلہ اوّل کی بے حرمتی کا سلسلہ ایک ایسے وقت میں جاری ہے جب دوسری جانب امریکی نائب صدر مائیک پنس اسرائیل کے دورے پرہیں۔
امریکی نائب صدر نے قبلہ اوّل کی دیوار براق میں آمد کا اعلان کیا ہے۔ عینی شاہدین کا کہنا ہے کہ امریکی نائب صدر کی آمد سے قبل صیہونی آباد کار زیادہ پرجوش دکھائی دیتے ہیں۔ گذشتہ روز صیہونی شرپسندوں نے قبلہ اوّل میں گھس کر نہ صرف مقدس مقام کی بے حرمتی کی بلکہ فلسطینیوں کے خلاف اشتعال انگیز نعرے بھی لگائے۔
فلسطینی محکمہ اوقاف نے بتایا ہے کہ سوموار کوعلی الصباح 42 صیہونی آباد کار مراکشی دروازے کے راستے قبلہ اوّل میں داخل ہوئے اور حرم قدسی کی بے حرمتی کا ارتکاب کیا۔Â صیہونی آباد کار مسجد اقصیٰ میں مراکشی دروازے اور باب السلسلہ سے داخل ہوئے۔ صیہونی آباد کاروں کو اسرائیل پولیس کی طرف سے فول پروف سیکیورٹی مہیا کی گئی تھی۔
رپورٹ کے مطابق مسجد اقصیٰ کے دروازوں کے باہر تعینات کی گئی اسرائیلی فولیس نے فلسطینی نمازیوں کے ساتھ بدسلوکی کی اور ان کی شناخت پریڈ کے ساتھ انہیں قبلہ اوّل میں عبادت کے لیے داخل ہونے سے روکنے کی کوشش کرتے رہے۔ اسرائیلی فوج کی جانب سے روکنے پر فلسطینی مشتعل ہوگئے اور انہوں نے اسرائیلی فوج اور پولیس کی غنڈہ گردی کے خلاف شدید نعرے بازی کی۔