جنیوا (فلسطین نیوز۔مرکز اطلاعات) اقوام متحدہ کے ہائی کمیشن برائے انسانی حقوق کی طرف سے فلسطین میں صیہونی آباد کاری میں ملوث 206 بین الاقوامی کمپنیوں کی فہرست جاری کی گئی ہے۔
عالمی ادارے کی جانب سے جاری کردہ رپورٹ میں کہا گیا ہے کہ فلسطین کے دریائے اردن کے مغربی کنارے کے شہروں میں 206 کمپنیاں صیہونی آباد کاری میں ملوث ہیں۔ رپورٹ میں فلسطین میں صیہونی آباد کاری کو فلسطینیوں کے خلاف عالمی قوانین کی خلاف ورزی اور امن مساعی کو تباہ کرنے کی سازش قرار دیا ہے۔رپورٹ میں کہا گیا ہے کہ غرب اردن کی حساس سیاسی اور اقتصادی حیثیت کے پیش نظر ان علاقوں میں صیہونی آباد کاری میں ملوث کمپنیوں کو بائیکاٹ یا ان کی سرمایہ کاری کے خطرے کا سامنا ہوسکتا ہے کیونکہ عالمی برادری مقبوضہ مغربی کنارے میں اسرائیل کی صیہونی کالونیوں کو غیرآئینی قرار دیتی ہے اور صیہونی آباد کاری روکنے کے لیے اسرائیل پر دباؤ ڈال رہی ہے۔
رپورٹ میں کہا گیا ہے کہ فلسطینی علاقوں میں صیہونی آباد کاری میں سرگرم کمپنیوں میں سے 143 اسرائیل کے اندر قائم ہیں جب کہ 22 امریکی کمپنیاں بھی متنازع علاقوں کو یہودیانے میں سرگرم ہیں۔ دیگر 19 کمپنیوں کا تعلق دوسرے ملکوں سے ہے۔