نابلس (فلسطین نیوز۔مرکز اطلاعات) صہیونی ریاست کی ایک عدالت نے گرفتاری اور اس کے بعد اسرائیلی جلادوں کے تشدد سے بینائی سے محروم فلسطینی نوجوان کو 16 ماہ قید اور 5 ہزار شیکل جرمانہ کی سزا کا حکم دیا ہے۔
فلسطین نیوز کو موصول ہونے والی اطلاعات کے مطابق اسرائیل کی ’سالم‘ فوجی عدالت نے گذشتہ روز فلسطینی نوجوان محمد مازن دویکات کو سولہ ماہ قید اور جرمانے کی سزا سنائی۔ دویکات کا رہائشی تعلق غرب اردن کے شمالی شہر نابلس سے ہے۔خیال رہے کہ دویکات کو اسرائیلی فوج نے 6 دسمبر 2016ء کو حراست میں لیا تھا۔ اس کی گرفتاری اس کی شادی کے ایک ہفتے بعد عمل میں لائی گئی تھی۔
محمد مازن دویکات کو اسرائیلی فوج نے گرفتاری اور اس کے بعد وحشیانہ تشدد کا نشانہ بنایا جس کے باعث اس کی آنکھوں کی بینائی بری طرح متاثر ہوئی ہے۔ دوران اسیری اسے کسی قسم کی طبی سہولت بھی مہیا نہیں کی گئی جس کے باعث اس کی بینائی تقریبا ختم ہوچکی ہے۔