مقبوضہ بیت المقدس – (فلسطین نیوز۔مرکز اطلاعات) صہیونی فوج نے فلسطین کے مقبوضہ بیت المقدس میں شاہراہ صلاح الدین پر ایک عمر رسیدہ فلسطینی شہری کو وحشیانہ تشدد کا نشانہ بنایا جس کے نتیجے میں وہ شدید زخمی ہوگیا۔ صہیونی فوج نے القدس میں سلوان کے مقام سے ایک سابق اسیر کو حراست میں لے لیا۔
فلسطین نیوز کو موصول ہونے والی اطلاعات کے مطابق صہیونی فوج نے شاہراہ صلاح الدین پر ایک عمر رسیدہ شہری کو اس وقت تشدد کا نشانہ بنایا جب فلسطینی نوجوان اپنے دفاع میں اسرائیلی فوج پر سنگ باری کر رہے تھے۔
اسرائیلی فوج نے سلوان میں چھاپے کے دوران سابق اسیر اور شہید کے بھائی علی شیوخی کو حراست میں لینے کے بعد نامعلوم مقام پر منتقل کردیا۔ خیال رہے کہ علی شیوخی کو ایک ہفتہ قبل ایک سال جیل میں رکھنے کے بعد اسرائیلی فوج نے رہا کیا تھا۔