غرب اردن: تہوار کی آڑ میں اسرائیلی فوجی چھاؤنی میں تبدیل

رام اللہ (فلسطین نیوز۔مرکز اطلاعات) یہودیوں کے مذہبی تہوار’البوریم‘ کی آڑ میں دریائے اردن کے مغربی کنارے اور غزہ کی پٹی کے سرحدی مقامات میں اسرائیلی فوج نے غیر اعلانیہ کرفیو نافذ کرکے تمام علاقے سیل کر دیے ہیں۔

فلسطین نیوز کو موصول ہونے والی اطلاعات کے مطابق اسرائیلی فوج کی طرف سے جاری کردہ ایک بیان میں کہا گیا ہے کہ سوموار غرب اردن کے شہروں میں فوج اور پولیس کی بھاری نفری تعینات کی  گئی۔ اس دوران فلسطینیوں کو پبلک مقامات کی طرف جانے اور صیہونی کالونیوں کے قریب آنے کی اجازت نہیں ہوگی۔

اسرائیلی میڈیا کے مطابق غرب اردن، بیت المقدس اور غزہ کی پٹی کے سرحدی علاقوں میں فوج کی تعینات یہودیوں کے مذہبی تہوار ’عید البوریم‘ کی تقریبات کے موقع پر کی گئی ہے۔

دوسری جانب مقامی فلسطینی ذرائع کا کہنا ہے کہ اسرائیلی فوج نے غرب اردن میں فوج اور پولیس کی بھاری نفری تعینات کرکے غیراعلانیہ کرفیو لگا دیا ہے۔

خیال رہے کہ یہودیوں کے مذہبی تہوار عموما فلسطینیوں کے لیے پابندیوں کا پیغام بن کرآتے ہیں۔ ان تہواروں کی آڑ میں صیہونی فوج فلسطینیوں کے خلاف سنگین پابندیاں عائد کرتی ہے۔ انسانی حقوق کی عالمی تنظیموں کی اپیلوں کے باوجود فلسطینی شہریوں کی زندگی اجیرن بنا دی جاتی ہے۔