نابلس – (فلسطین نیوز۔مرکز اطلاعات) فلسطین کے مقبوضہ مغربی کنارے کے شمالی شہر نابلس میں ٹریفک کے ایک المناک حادثے کے نتیجے میں کم سے کم چار شہری جاں بحق اور چار زخمی ہوگئے ہیں۔ یہ حادثہ تین کاروں کے آپس میں ٹکرانے کے نتیجے میں پیش آیا۔
فلسطینی شہری دفاع کے حکام کی طرف سے جاری ایک بیان میں بتایا گیا ہے کہ ہفتے کی شام جنوبی نابلس میں الساویہ کے مقام پر تین کاریں آپس میں ٹکرا گئیں جس کے نتیجے میں چار شہری موقع پرہی جاں بحق اور چار زخمی ہوگئے۔ ان میں سے تین افراد ن میں دو خواتین اور ایک مرد شامل ہیں بیت المقدس سے تعلق رکھتے ہیں۔ وہ تینوں اسرائیلی نمبر پلیٹ والی ہونڈا گاڑی پر سوار تھے۔جاں بحق ہونے والے ایک شہری کا تعلق نابلس سے ہے۔ وہ ہونڈا i30 ماڈل کی گاڑی میں سوار تھا۔ حادثے میں کم سے کم چار افراد زخمی ہوئے ہیں جنہیں اسپتالوں میں منتقل کردیا گیا ہے۔ زخمیوں میں سے بعض کی حالت تشویشناک بیان کی جاتی ہے۔
قبل ازیں فلسطینی ہلال احمر کی طرف سے جاری کردہ ایک بیان میں بتایا گیا تھا کہ نابلس میں ٹریفک حادثے میں چار شہری فوت ہوئے ہیں۔ ایک کا تعلق نابلس سے ہے جب کہ تین کا تعلق شمالی فلسطین کے سنہ 1948ء کے علاقوں سے بتایا گیا تھا۔ بعد ازاں پتا چلا کہ جاں بحق ہونے والے تین شہری بیت المقدس کے رہائشی ہیں۔
خیال رہے کہ یہ غرب اردن میں ایک ہفتے میں ٹریفک کا دوسرا المناک حادثہ ہے۔ چند روز قبل بھی ٹریفک کے ایسے ہی ایک حادثے میں متعدد افراد جاں بحق اور زخمی ہوگئے تھے۔