صیہونی فوجی فلسطینی اسکول میں داخل، بموں سے حملہ

الخلیل (فلسطین نیوز۔مرکز اطلاعات) صیہونی فوج کی بھاری نفری نے گذشتہ روز مقبوضہ مغربی کنارے کے جنوبی شہر الخلیل کے ایک پرائمری اسکول پر چھاپہ مارا اور اسکول میں موجود بچوں پر صوتی بموں اور آنسوگیس کی شیلنگ سے حملہ کیا۔

فلسطین نیوز کو موصول ہونے والی اطلاعات کے مطابق تین جیپوں پر سوار درجنوں اسرائیلی فوجی الخلیل شہر کے النہضہ اسکول میں داخل ہوئے۔ صیہونی فوج نے فلسطینی بچوں پر آنسوگیس کی شیلنگ کی اور ان پر صوتی بموں کا استعمال کیا۔

اسرائیلی فوج کی طرف سے کہا گیا ہے کہ النہضہ اسکول کے بچوں نے  اسرائیلی فوج اور صیہونی آباد کاروں کی گاڑیوں پر سنگ باری کی ہے۔ ااسرائیلی فوج سنگ باروں کی تلاش میں اسکول میں داخل ہوئی ہے۔

خیال رہے کہ یہ پہلا موقع نہیں کہ اسرائیلی فوج نے فلسطینی اسکول میں گھس کر طلباء کو زدو کوب کیا ہے۔ اسرائیلی فوج اور پولیس آئے روز فلسینی اسکولوں میں گھس کر طلباء اور اساتذہ کو تشدد کا نشانہ بناتے ہیں۔