مقبوضہ بیت المقدس – (فلسطین نیوز۔مرکز اطلاعات) فلسطین کے مقبوضہ بیت المقدس شہر میں قائم شعفاط پناہ گزین کیمپ میں اسرائیلی فوج اور فلسطینی نوجوانوں کےدرمیان جھڑپوں کی اطلاعات ہیں۔
فلسطین نیوز کو موصول ہونے والی اطلاعات کے مطابق مقامی فلسطینی ذرائع نے بتایا کہ صہیونی فوج کی بھاری نفری نے منگل کے روز شعفاط کیمپ کا محاصرہ کیا اور کیمپ پر فائرنگ، آنسوگیس کی شیلنگ، دھواں چھوڑنے والے بم اور صوتی بم پھینکے۔ دوسری جانب کیمپ میں موجود شہری صہیونی فوج کی جارحیت کے خلاف نعرے لگاتے ہوئے سڑکوں پر نکل آئے۔ نقاب پوش فلسطینی نوجوانوں نے صہیونی فوج اور پولیس پر سنگ باری کی اور ان پر پٹرول بم پھینکے۔مقامی طبی ذرائع کے مطابق اسرائیلی فوج کی طرف سے دھاتی گولیوں کی بوچھاڑ سے ایک بچے سمیت متعدد فلسطینی زخمی ہوئے ہیں۔ بچی کی آنکھ میں دھاتی گولی لگی ہے جس کے نتیجے میں اس کی حالت تشویشناک بیان کی جاتی ہے۔ دھاتی گولیوں سے زخمی ہونے والے دو دیگر نوجوانوں کو بھی اسپتال منتقل کیا گیا ہے۔
فلسطینی شہریوں اور اسرائیلی فوج کے درمیان کئی گھنٹے تک آنکھ مچولی کا سلسلہ جاری رہا۔