نابلس – (فلسطین نیوز۔مرکز اطلاعات) صہیونی فوج نے فلسطین کے مقبوضہ مغربی کنارے کے شمالی شہر نابلس میں تلاشی کی کارروائی کے دوران اسلامی تحریک مزاحمت ’حماس‘ کے مقامی رہنما کا بیٹا حراست میں لینے کے بعد نامعلوم مقام پر منتقل کردیا ہے۔
فلسطین نیوز کو موصول ہونے والی اطلاعات کے مطابق بدھ کو اسرائیلی فورسز نے نابلس میں شاہراہ تل پر واقع حماس کے اسیر رہنما عدنان عصفور کے گھر پر چھاپہ مارا۔ صہیونی فوج نے گھر کا محاصرہ کرنے کے بعد اس میں داخل ہو کر اس کی توڑپھوڑ کی۔ بعد ازاں اسیر رہنما کے بیٹے 21 سالہ محمد عصفور کو حراست میں لے کرنامعلوم مقام پر منتقل کردیا۔محمد عدنان عصفور نابلس کی جامعہ النجاح کا طالب علم ہے۔ ادھر نابلس میں اسرائیلی فوج کی تلاشی مہم کے دوران فلسطینی شہریوں نے احتجاجی مظاہرے کیے۔ اسرائیلی فورسز نے مظاہرین پر اشک آور گیس کی شیلنگ کی۔
خیال رہے کہ حماس رہنما 53 سالہ عدنان عصفور کو گذشتہ 14 ماہ سے مسلسل انتظامی حراست کے تحت پابند سلاسل رکھا گیا ہے۔ وہ اب تک 12 سال اسرائیلی جیلوں میں قید کاٹ چکے ہیں۔