مقبوضہ بیت المقدس (فلسطین نیوز۔مرکز اطلاعات) کل جمعہ کے روز مسجد اقصیٰ میں 50 ہزار سے زائد فلسطینی شہریوں نے نماز جمعہ ادا کی۔ اس موقع پراسرائیلی فوج کی بھاری نفری نے مسجد اقصیٰ کے اطراف کے مقامات کو گھیرے میں لے کر فلسطینیوں کی آمد پر پابندی عائد کر رکھی تھی تاہم ہزاروں فلسطینی صیہونی فوج اور پولیس کی رکاوٹیں توڑ کر مسجد اقصیٰ میں پہنچنے میں کامیاب رہے۔
فلسطین نیوز کو موصول ہونے والی اطلاعات کے مطابق مقامی ذرائع نے بتایا کہ جمعہ کی نماز میں شرکت کے لیے فلسطینی شہریوں کی مسجد اقصیٰ آمد کا سلسلہ صبح سے شروع ہوگیا تھا۔ اس موقع پر اسرائیلی فوج اور پولیس نے ناکے لگا کر فلسطینیوں کی جامہ تلاشی اور سیکیورٹی کی آڑ میں انہیں زدو کوب کرنے کا سلسلہ جاری رکھا۔
نماز جمعہ کی امامت کے فرائض ممتاز عالم دین الشیخ یوسف ابو اسنینہ نے ادا کیے۔ انہوں نے جمعہ کی تقریر میں فلسطینیوں کے خلاف صیہونی ریاست کے جرائم پر روشنی ڈالی۔
انہوں نے فلسطینیوں سے اپنی صفوں میں اتحاد پیدا کرنے کی ضرورت پر زور دیا اور کہا کہ بے گناہ لوگوں کا قتل اسلام میں حرام ہے۔ انہوں نے فلسطینی قوم کے دیرینہ حقوق کے دفاع کے لیے فلسطینیوں کی جدو جہد کو اسلامی تعلیمات کے عین مطابق قرار دیا۔