الخلیل – (فلسطین نیوز۔مرکز اطلاعات) اسرائیلی حکومت نے فلسطین کے مقبوضہ مغربی کنارے کے جنوبی شہر الخلیل میں صہیونیوں کو بسانے کے لیے مزید 31 مکانات کی تعمیر کی منظوری دی ہے۔
فلسطین نیوز کو موصول ہونے والی اطلاعات کے مطابق اتوار کے روز اسرائیلی کابینہ کے اجلاس میں الخلیل شہر کے وسط میں حزقیا صہیونی کالونی میں مزید 30 مکانات تعمیر کرنے کا فیصلہ کیا گیا ہے۔رپورٹ کے مطابق الخلیل میں تازہ آباد کاری کے منصوبے کے پیچھے وزیر داخلہ اور شاس پارٹی کے سربراہ اریہ درعی اور وزیر تعلیم نتالی بینت کا ہاتھ ہے۔ انہوں نے مل کر ہی یہ منصوبہ تیار کیا ہے۔
رپورٹ کے مطابق حزقیا کالونی میں 31 مکانات کے علاوہ ایک اسکول، چلڈرن پارک اور فلاحی مرکز کے علاوہ کئی دوسری تنصیبات شامل ہیں۔
ادھر اسرائیلی وزیر ماحولیات زئیف الکین نے ایک بیان میں کہا ہے کہ غرب اردن میں حزقیا میں صہیونی آباد کاری فلسطین کی انٹرپول میں شمولیت کا رد عمل ہے۔