مقبوضہ بیت المقدس (فلسطین نیوز۔مرکز اطلاعات) صیہونی ریاست کا بس چلے تو وہ فلسطینیوں سے سانس لینے کا حق بھی چھین لے کیونکہ فلسطینی شہریوں کو صیہونی ریاست کی طرف سے گھر میں مویشی پالنے اور گدھے جیسے جانور رکھنے کا اپنی مرضی سے حق نہیں۔ اگر کوئی گدھا بھی رکھتا ہے تو اسے اس کے لیے صیہونی ریاست سے باقاعدہ پرمٹ لینا ہوگا۔
فلسطین نیوز کو موصول ہونے والی اطلاعات کے مطابق یہ محض ابلاغی پروپیگنڈہ نہیں بلکہ حقیقت ہے جس کی تازہ مثال بیت المقدس میں گذشتہ روز بھی دیکھی گئی جب اسرائیلی پولیس نے ایک فلسطینی شہری کو حراست میں لینے کے بعد اس کا گدھا بھی قبضے میں لے لیا۔ذرائع ابلاغ میں آنے والی اس خبر کے ساتھ تصاویر بھی شامل ہیں جن میں ایک بے زبان گدھے کو درجنوں اسرائیلی فوجیوں کے محاصرے میں دیکھا جا سکتا ہے۔ یہ واقعہ مسجد اقصیٰ کے جنوب میں واقع سلوان کے مقام پر پیش آیا۔
عینی شاہدین نے بتایا کہ اسرائیلی اسرائیلی فوج نے گدھے کے مالک کو حراست میں لیا اور اسے کہا گیا کہ اس نے حکومت کی اجازت کے بغیر گھر میں گدھا رکھا ہوا ہے۔ بعد ازاں گدھے کو بھی محاصرے میں لے کرہانک کر نامعلوم مقام پر لے جایا گیا ہے۔