مقبوضہ بیت المقدس (فلسطین نیوز۔مرکز اطلاعات) اسرائیل کے عبرانی ذرائع ابلاغ نے بتایا ہے کہ غرب اردن کی صیہونی کالونیوں کے اسرائیل سے الحاق کے حوالے سے امریکی حکومت کے ساتھ پائے جانے والے اختلافات دور کرنے کے لیے وزیراعظم بنجمن نیتن یاھو آئندہ ماہ مارچ میں واشنگٹن میں صدر ٹرمپ سے ملاقات کریں گے۔
فلسطین نیوز کو موصول ہونے والی اطلاعات کے مطابق عبرانی اخبار’یدیعوت احرونوت‘ کی رپورٹ میں وزیراعظم بنجمن نیتن یاھو آئندہ ماہ پانچ مارچ کو امریکا کا دورہ کریں گے جہاں ان کی ملاقات امریکی صدر ڈونلڈ ٹرمپ سے ہوگی۔عبرانی اخبار کی ویب سائیٹ کی خبر کے مطابق وائیٹ ہاؤس میں ہونے والی ملاقات میں نیتن یاھو غرب اردن کی صیہونی کالونیوں کے اسرائیل سے باضابطہ الحاق کےحوالے سے پائے جانے والے اختلافات دور کرنے کی کوشش کریں گے۔
عبرانی اخبار کے مطابق صیہونی حکومت امریکا کے ساتھ صیہونی کالونیوں کے حوالے سے پائے جانے والے اختلافات ختم کرکے دونوں ملکوں کےدرمیان ہم آہنگی پیدا کرنے کی کوشش کررہی ہے تاکہ بیت المقدس کی طرح مقبوضہ مغربی کنارے کو بھی صیہونی ریاست میں شامل کیا جاسکے۔
حال ہی میں اسرائیلی وزیراعظم نیتن یاھو نے دعویٰ کیا تھاکہ انہوں نے غرب اردن کی صیہونی کالونیوں کے الحاق کے حوالے سے امریکا سے متعدد بار مشورہ کیا ہے تاہم امریکی حکومت کے ترجامن جوش ارنیسٹ کاکہنا ہے کہ غرب اردن کی صیہونی کالونیوں کے الحاق کے حوالے سے امریکا اور اسرائیل کے درمیان کسی قسم کی بات چیت نہیں ہوئی ہے۔
عبرانی اخبار کی طرف سے ٹرمپ سے ملاقات کے حوالے سے خبر پر سرکاری سطح پر کوئی رد عمل سامنے نہیں آیا ہے۔ نیتن یاھو کے دفتر سے اس خبر کی تصدیق نہیں کی گئی تاہم بہ ظاہرلگتا ہے کہ اسرائیل موجودہ امریکی صدر کی موجودگی میں اپنے بہت سے مطالبات منوانے کے لیے پوری تند دہی سے کوشش کرتی ہے۔