مقبوضہ بیت المقدس – (فلسطین نیوز۔مرکز اطلاعات) اسرائیل کے عبرانی ذرائع ابلاغ کے مطابق امریکا اور اسرائیل کے درمیان تجارتی درآمدات وبرآمدات کا حجم سالانہ 19 ارب ڈالر سے تجاوز کرگیا ہے۔
فلسطین نیوز کو موصول ہونے والی اطلاعات کے مطابق گذشتہ برس اسرائیل اور امریکا کے درمیان تجارتی درآمدات کے حجم میں 3 فی صد اضافہ ہوا جس کے بعد یہ حجم 19 ارب ڈالر تک جا پہنچا ہے۔رپورٹ میں بتایا گیا ہے کہ امریکا کے لیے برآمدات میں 2016ء کے دوران پانچ فی صد اضافہ ہوا جس کے بعد برامدات 11.6 ارب ڈالر تک پہنچ گئیں۔ گذشتہ چھ برسوں کے دوران یہ امریکا کے لیے اسرائیلی برآمدات کا یہ نیا ریکارڈ ہے۔
دوسری طرف اسرائیل امریکا سے الیکٹرک کا سامان، گاڑیاں، طیارے، کیمیائی مواد اور دیگر اشیا خرید کرتا ہے۔ یہی وجہ ہے کہ مذکورہ اشیاء کی فروخت کے حوالے سے اسرائیل امریکا کا ایک بڑا گاہک ہے۔ گذشتہ برس دونوں ملکوں کی درآمدات کا حجم نو ارب ڈالر رہا۔