مقبوضہ بیت المقدس – (فلسطین نیوز۔مرکز اطلاعات) مقبوضہ فلسطین علاقے میں قائم اسرائیلی فوج کے ایک کیمپ میں طاعون کی شکل کی وبا پھوٹ پڑی ہے جس کے نتیجے میں کم سے کم 120 فوجی افسر اور اہلکار اس سے متاثر ہوئے ہیں جنہیں علاج کے لیے اسپتالوں میں داخل کرایا گیا ہے۔
اسرائیل کے عبرانی نیوز ویب پورٹل ’’ 0404‘‘ نے اپنی رپورٹ میں بتایا ہے کہ فوجی کیمپ میں پھوٹنے والی پراسرار بیماری کی علامات طاعون کی علامات سے ملتی ہیں۔ تمام فوجیوں کی جلد بری طرح متاثر ہوئی ہے۔اسپتالوں میں لائے گئے فوجیوں کی جلد پر پھوڑےنکلنے کے ساتھ ساتھ پورے جسم میں شدید تکلیف محسوس کی جا رہی ہے۔
فوج نے اس پراسرار بیماری پھوٹنے کی تحقیقات کے لیے ایک کمیٹی تشکیل دی ہے۔ بیماری سے متاثر کیمپ کو خالی کرالیا گیا ہے۔ فوج نے ماہرین صحت کو واقعے کی تحقیقات میں معاونت کے لیے طلب کیا ہے۔ بیمار پڑنے والے فوجیوں کے خون کے نمونوں کی مدد سے بیماری کی تشخیص کی کوشش کی جا رہی ہے۔ ذرائع کا کہنا ہے کہ پراسرار بیماری کا شکار اسرائیلی فوجی اسپتالوں میں منتقل کیے جانے کے باوجود ان کی حالت بدستور خراب ہے۔