مقبوضہ فلسطین – (فلسطین نیوز۔مرکز اطلاعات) یورپی یونین کی خارجہ پالیسی کی سربراہ نے مقبوضہ فلسطین میں صیہونی کالونیوں کی تعمیر روکنے کا مطالبہ کیا ہے
فلسطین نیوز کو موصول ہونے والی اطلاعات کے مطابق یورپی یونین کی خارجہ پالیسی کی سربراہ فیڈریکا موگرینی نے جمعرات کو فلسطینی علاقوں میں اسرائیلی حکومت کی جانب سے کالونیوں کی تعمیر کے بارے میں منعقدہ یورپی پارلیمنٹ کے اجلاس میں کہا کہ انھیں ، اسرائیلی حکومت کی کالونیوں کی تعمیر سے اختلاف ہے۔ یورپی یونین کی خارجہ پالیسی کی سربراہ نے مزید کہا کہ عالمی برادری بھی کالونیوں کی تعمیر بند کئے جانے کی حمایت کرتی ہے۔ موگرینی نے دعوی کیا کہ یورپی یونین کا واضح موقف یہ ہے کہ فلسطینی اوراسرائیلی دو حکومتوں کی تشکیل کے طریقہ کار کا جائزہ لیا جائے۔فیڈریکا موگرینی کا موقف ایسی حالت میں سامنے آیا ہے کہ امریکہ اور مغربی یورپی ممالک ہمیشہ ہی صیہونی حکومت کی حمایت کرتے رہے ہیں۔ اسرائیلی حکومت نے امریکی صدارتی انتخابات میں ڈونالڈ ٹرمپ کی کامیابی کے بعد اپنے پہلے اقدام میں مشرقی بیت المقدس میں ایک یہودی کالونی میں پانچ سو رہائشی کمپلکس کی تعمیر کا سلسلہ دوبارہ شروع کردیا ہے۔ صیہونی حکومت نے انیس سو سڑسٹھ میں مشرقی بیت المقدس پر قبضہ کرکے اسے اسرائیل میں ضم کر لیا ہے جس کی عالمی برادری نے مخالفت اور مذمت بھی کی ہے۔