مقبوضہ بیت المقدس (فلسطین نیوز۔مرکز اطلاعات) اسرائیل اور فرانس کے ذرائع ابلاغ نے انکشاف کیا ہے کہ اسرائیلی پولیس نے بیت المقدس میں فرانسیسی قونصل خانے کے ایک عہدیدار کو حراست میں لیا ہے۔ اس پر غزہ کی پٹی سے بیت المقدس اسلحہ اسمگل کرنے کا الزام عائد کیا گیا ہے۔
فلسطین نیوز کو موصول ہونے والی اطلاعات کے مطابق عبرانی اخبار’ہارٹز‘ کے مطابق فرانسیسی قونصل خانے کے ایک فلسطینی عہدیدار کو 19فروری کو غزہ سے القدس آتے ہوئے ’ایرز‘ گذرگاہ سے حراست میں لیا گیا تھا۔ ملزم کی عمر 24 بتائی جاتی ہے اور اس پر غزہ سے القدس اسلحہ اسمگل کرنے کی کوششوں کا الزام عائد کیا گیا ہے۔فرانسیسی خبر رساں ادارے کے مطابق گرفتار فلسطینی کو بئر سبع کی ایک فوجی عدالت میں پیش کیا گیا۔ ملزم غرب اردن، غزہ اور بیت المقدس میں قونصل جنرل میں تعینات رہ چکا ہے۔
اسرائیلی حکام نے اس گرفتاری کو اب تک صیغہ راز میں رکھا ہے۔ آج عدالت نے ملزم کی پیشی کے بعد اس خبر کو افشاء کرنے کی اجازت دے دی تھی۔
فرانسیسی خبر رساں ادارے کے مطابق گرفتار ملزم پر سنگین نوعیت کے الزامات عائد کیے گئے ہیں۔ان میں سیکیورٹی سے متعلق الزامات شامل ہیں جن مین مشتبہ طورپر اسلحہ کی منتقلی کا بھی الزام عائد کیا گیا ہے۔
فرانسیسی سفارت خانے کے ترجمان کا کہنا ہے کہ ہم ملازم کی گرفتاری کے معاملے کو سنجیدگی سے لے رہے ہیں۔ صیہونی حکام کے ساتھ بھی رابطہ کیا گیا ہے تاہم اس حوالے سے مزید تفصیلات سامنے نہیں آئی ہیں۔