صیہونی ریاست طاقت کے گھمنڈ سے کشیدگی کو ہوا دے رہا ہے: لبنان

بیروت (فلسطین نیوز۔مرکز اطلاعات) لبنان نے اسرائیلی ریاست کی جارحانہ پالیسی کو ایک بار پھرتنقید کا نشانہ بناتے ہوئے خبردار کیا ہے کہ اسرائیلی ریاست کے جارحانہ اقدامات خطے کو تباہی کی طرف لے جا رہے ہیں۔

 

فلسطین نیوز کو موصول ہونے والی اطلاعات کے مطابق لبنانی وزیرخارجہ جبران باسل نے اپنے برازیلین ہم منصب الویزیو نونیس کے ہمراہ

بیروت میں ایک مشترکہ پریس کانفرنس میں کہا کہ اسرائیل طاقت کے استعمال، عالمی قراردادوں پر عمل درآمد سے فرار اور امن مساعی کو تباہ کر کے کشیدگی کو ہوا دینے اور خطے کو ایک نئی تباہی کی طرف لے جانے کا مرتکب ہو رہا ہے۔

ان کا کہنا تھا کہ اسرائیل کی طرف سے آزاد فلسطینی ریاست کے تصور کو مسترد کرنے، دوسرے ممالک کے ساتھ بقائے باہمی کے اصول کو ترک کرنے اور جارحانہ حکمت اختیار کرنے سے کشیدگی میں اضافہ ہو رہا ہے۔

جبران باسل کا کہنا تھا کہ بیت المقدس کے حوالے سے اسرائیلی ریاست کے مکروہ اقدامات نہ صرف مسلمانوں کے مذہبی جذبات کو ٹھیس پہنچا رہے ہیں بلکہ یہ تین آسمانی مذاہب کی تعلیمات کی بھی صریح خلاف ورزی ہیں۔

ان کا کہنا تھا کہ لبنان امن، مذاکرات، عالمی قوانین پرعمل درآمد اور بین الاقوامی قراردادوں کی پاسداری پر یقین رکھتا ہے جب کہ اسرائیلی ریاست دہشت گردی کی پالیسی کو فروغ دینے کے ساتھ دنیا کو بھی اس پراکسا رہی ہے۔