مقبوضہ بیت المقدس – (فلسطین نیوز۔مرکز اطلاعات) صیہونی حکومت کے نمائندے کی شرکت کی وجہ سے فیفا کے اجلاس کی میزبانی کرنے سے ملیشیا کے انکار کے بعد بحرینی حکومت نے صیہونی حکومت کے نمائندے کی موجودگی میں اس اجلاس کی میزبانی قبول کرلی ہے۔
صیہونی حکومت کی ایک ویب سائٹ روٹر نے اسرائیل کے لئے آل خلیفہ حکومت کی خوشامدانہ پالیسیوں کا حوالہ دیتے ہوئے لکھا ہے کہ بحرین کی فوٹبال فیڈریشن کے سربراہ شیخ علی بن خلیفہ آل خلیفہ نے اعلان کیا ہے کہ منامہ مئی دوہزار سترہ میں فیفا کی جنرل اسمبلی کے اجلاس کی میزبانی کے لئے تیار ہے۔ اس اجلاس میں اسرائیلی نمائندہ بھی شریک رہے گا۔ اس سے پہلے ملیشیا کی فوٹبال فیڈریشن نے یہ کہتے ہوئے اجلاس کی میزبانی کرنے سے انکار کردیا تھا کہ اس میں صیہونی حکومت کا نمائندہ بھی شریک ہوگا۔ ملیشیا کے نائب وزیراعظم زاہد حمیدی کے حکم پر ملیشیا کی فوٹبال فیڈریشن نے یہ کہہ کے اجلاس کی میزبانی سے معذرت کرلی تھی کہ ہم صیہونی حکومت کے نمائندے کو ملیشیا کا ویزا نہیں دے سکتے۔ چند روز قبل فرانس میں بھی مختلف تنظیموں کے کارکنوں اور عرب کمیونٹی نے ایک مظاہرہ کرکے فیفا میں صیہونی حکومت کی موجودگی پر شدید احتجاج کرتے ہوئے فیفا کی انتظامی کمیٹی سے صیہونی حکومت کو نکالنے کا مطالبہ کیا تھا۔
صیہونی حکومت کے لئے آل خلیفہ حکومت کی خوشامدانہ پالیسیاں
