نیویارک (فلسطین نیوز۔مرکز اطلاعات) اقوام متحدہ میں فلسطین کے مستقل مندوب ریاض منصور نے بتایا کہ فلسطین کے علاقے غزہ کی پٹی میں جاری انسانی بحران کے حل کے سلسلے میں آئندہ بُدھ کو سلامتی کونسل کا ہنگامی مشاورتی اجلاس طلب کیا گیا ہے۔
فلسطین نیوز کو موصول ہونے والی اطلاعات کے مطابق اقوام متحدہ میں فلسطینی مندوب ریاض منصور نے بتایا کہ غزہ کی پٹی میں جاری ایندھن، بجلی، خوراک، طبی سامان اور دیگر بحرانوں پر غور کے لیے کویت کی طرف سے سلامتی کونسل کا ہنگامی مشاورتی اجلاس طلب کیا گیا ہے۔خیال رہے کہ کویت واحد عرب ملک ہے جو رواں ماہ کے دوران ہونے والے سلامتی کونسل کے اجلاس کی صدارت کر رہا ہے۔
انہوں نے بتایا کہ اقوام متحدہ کے امن مندوب برائے مشرق وسطیٰ نیکولائے میلاڈینوف سلامتی کونسل کے مشاورتی اجلاس میں غزہ کی صورت حال کے بارے میں بریفنگ دیں گے۔
خیال رہے کہ غزہ کی پٹی کے علاقے پر اسرائیلی فوج نے 2006ء میں فلسطین میں ہونے والے پارلیمانی انتخابات میں اسلامی تحریک مزاحمت ’حماس‘ کی کامیابی کے بعد اجتماعی انتقامی کارروائی کے تحت پابندیاں عائد کردی تھیں۔