مقبوضہ بیت المقدس – (فلسطین نیوز۔مرکز اطلاعات) اسرائیلی وزیراعظم بنجمن نیتن یاھو پرسوں بدھ کو روس کے دورے پر ماسکو جائیں گے جہاں وہ روسی صدر ولادی میرپوتن سمیت دیگر روسی حکام سے ملاقات کریں گے۔
فلسطین نیوز کو موصول ہونے والی اطلاعات کے مطابق نیتن یاھو اور روسی صدر کے درمیان ملاقات روس کے جنوب مغربی شہر سوچی میں ہوگی۔ ملاقات میں علاقائی امور اور باہمی دلچسپی کے امور پرتبادلہ خیال کیا جائے گا۔
ملاقات میں شام میں روسی اور اسرائیلی فضائیہ کے جنگی طیاروں کے درمیان کسی قسم کے ٹکراؤ سے بچانے کے اقدامات پر اتفاق کیا جائے گا۔
خیال رہے کہ نیتن یاھو اور پوتن کے درمیان آخری ملاقات مارچ میں ماسکو میں ہوئی تھی۔ گذشتہ ملاقات میں شام میں جاری جنگ کے خاتمے سے متعلق امور سر فہرست تھے۔ گذشتہ ماہ جولائی میں دونوں رہ نماؤں کے درمیان شام کی تازہ ترین صورت حال پر ٹیلیفون پر بات چیت ہوئی تھی۔