فلسطین نیوز کو موصول ہونے والی اطلاعات کے مطابق ہیگ میں قائم ’آئی سی سی‘ میں دائر کردہ پٹیشن میں سنہ 2014ء کو غزہ کی پٹی پر مسلط کی گئی اسرائیلی جنگ اور اس دوران سیکڑوں بے گناہ شہریوں کے قتل عام، بنیادی ڈھانچے کی تباہی اور مکانات کی مسماری کا حوالہ دیا گیا ہے۔
اس کے علاوہ پٹیشن میں مسجد اقصیٰ اور مقبوضہ بیت المقدس کی موجودہ صورت حال کو شامل کرتے ہوئے بتایا گیا ہے کہ اسرائیلی ریاست ایک سوچے سمجھے منصوبے کے تحت بیت المقدس کے شہریوں کی مذہبی آزادی پرقدغنیں عائد کررہی ہے۔ اسرائیلی فوج اور پولیس نے بغیر کسی الزام کے بیت المقدس کے دسیوں شہریوں کو حراست میں رکھا ہےجس کا مقصد مسجد اقصیٰ کی حمایت میں ریلیوں کے انعقاد کو روکنا اور فلسطینیوں کو قبلہ اوّل میں عبادت کے حق سے محروم کرنا ہے۔
پٹیشنر ایڈووکیٹ عبدالمجید مراری نے جنیوا میں میڈیا کو بتایا کہ انسانی حوق کے کارکنوں اور بین الاقوامی ماہرین قانون کے ایک گروپ نے مشترکہ طور پر اسرائیلی جرائم کے خلاف بین الاقوامی فوج داری عدالت میں پٹیشن دائر کی ہے۔ ان کا کہنا تھا کہ پٹیشن میں سنہ 2014ء کو غزہ کی پٹی میں اسرائیلی فوج کے ہاتھوں سیکڑوں بے گناہ فلسطینیوں کے قتل عام، فلسطینی علاقوں میں عالمی قوانین کی خلاف ورزی کرتے ہوئے صہیونی آباد کاری، بیت المقدس میں شہری آزادیوں پر اسرائیلی حملے،مقدس مقامات کی بندش اور اسرائیلی فوج کے ہاتھوں ان کی بے حرمتی کا حوالہ دیا گیا ہے۔