غزہ (فلسطین نیوز۔مرکز اطلاعات) اسلامی تحریک مزاحمت ‘حماس’ کے رہنما مشیر المصری کا کہنا ہے کہ فلسطینی عوام اور تمام عالم اسلام مقبوضہ بیت المقدس اور مسجد اقصیٰ کو حرمین شریفین کے برابر کی ہی تکریم دیتے ہیں اور ان کے ساتھ جڑے رہیں گے۔ یہ ہماری مذہبی، قومی، اخلاقی ذمہ داری ہے۔
فلسطین نیوز کو موصول ہونے والی اطلاعات کے مطابق غزہ کے شمالی علاقے بیت لحیہ میں حماس کی جانب سے منعقد کی جانے والی ایک بڑی ریلی سے خطاب کرتے ہوئے حماس رہنما نے دنیا بھر کے فلسطینیوں سے مطالبہ کیا کہ وہ بیت المقدس سے متعلق امریکی فیصلے پر احتجاج کریں۔انہوں نے فلسطینی اتھارٹی اور تنظیم آزادی فلسطین سے مطالبہ کیا کہ وہ اوسلو معاہدے سے باہر نکلنے، آباد کاری کے خاتمے اور اسرائیل سے سیکیورٹی تعاون کے خاتمے کے حوالے پی ایل او کے فیصلوں پر عمل کریں۔
انہوں نے عرب اور مسلمان ممالک سے اسرائیل کے ساتھ تعلقات کی بحالی کو مسترد کرنے کا مطالبہ کرتے ہوئے کہا کہ ایسا کرنا اسرائیل کو تسلیم کرنے اور فلسطینیوں کے خلاف جارحیت تصور کیا جائے گا۔