دوحہ – (فلسطین نیوز۔مرکز اطلاعات) حماس کی پولٹ بیورو کے سربراہ خالد مشعل کا کہنا ہے کہ ان کی تحریک کے نئے منشور کی مدد سے حماس کے ہمدرد ممالک کو عالمی فورمز پر مسئلہ فلسطین کی بڑھ چڑھ کر حمایت کرنے کا موقع ملے گا۔
فلسطین نیوز کو موصول ہونے والی اطلاعات کے مطابق فلسطینی خبررساں ایجنسی القدس پریس کو جاری کردہ ایک بیان میں خالد مشعل کا کہنا تھا کہ حماس کے رہنما اصول مسئلہ فلسطین کو ایک متناسب اور جامع طریقے سے دنیا کے سامنے پیش کرتے ہیں۔خالد مشعل نے ایک سوال کے جواب میں بتایا کہ یہ نئی پالیسی کسی ملک کے دبائو میں آ کر نہیں تیار کی گئی اور اس کے تمام تر مندرجات حماس کی قیادت کے طے کردہ ہیں۔
کچھ روز قبل حماس کی قیادت نے قطر کے دارالحکومت دوحہ میں حماس کی نئی پالیسی سے متعلق ایک دستاویز جاری کیا جس میں رہنما اصول اور پارٹی کا منشور شامل تھا۔
اس نئی دستاویز میں حماس نے فلسطینی ریاست کے قیام، اسرائیل کے ساتھ جنگ اور مذہبی انتہاپسندی سمیت دیگر امور پر پارٹی کی رائے کی وضاحت کی تھی۔