غزہ – (فلسطین نیوز۔مرکز اطلاعات) فلسطین کے علاقے غزہ کی پٹی میں اسرائیلی فوج کا بغیر پائلٹ ایک ڈرون طیارہ گر کر تباہ ہوگیا۔
فلسطین نیوز کو موصول ہونے والی اطلاعات کے مطابق اسرائیلی فوج کی طرف سے جاری کردہ ایک بیان میں کہا گیا ہے کہ غزہ کی جنوبی سرحد کے قریب ’اسکائی رائیڈر‘Â نامی ایک ڈرون طیارہ گر کر تباہ ہوگیا۔ادھر عبرانی اخبار ’معاریو‘ نے فوج کے ایک ترجمان کے حوالے سے بتایا ہے کہ ’اسکائی رائیڈر‘ ڈرون طیارہ گر کر تباہ ہوگیا۔ یہ ڈرون طیارہ روٹین کی عسکری مہم پر تھا۔
ڈرون طیارے کے حادثے کی جائے وقوعہ کی نشاندہی نہیں کی جاسکی تاہم فوج کی طرف سے کہا گیا ہے کہ ڈرون طیارے کے ملبہ کی گم شدگی سے حساس معلومات کے چوری ہونے کا کوئی خدشہ نہیں۔
خیال رہے کہ اسرائیل کے ڈرون طیاروں کے حادثات کے واقعات میں حالیہ عرصے میں اضافہ دیکھنے میں آیا ہے۔ گذشتہ کچھ عرصے سے جنوبی لبنان، وادی گولان، غرب اردن اور شمالی فلسطین میں اسرائیل کے ڈرون طیارے گر کر تباہ ہوگئے۔