غزہ – (فلسطین نیوز۔مرکز اطلاعات) غزہ کا محاصرہ ختم کرانے کے لئے عالمی کمپین نے مختلف ملکوں میں وسیع پیمانے پر ثقافتی پروگرام منعقد کئے ہیں۔
فلسطین نیوز کو موصول ہونے والی اطلاعات کے مطابق غزہ کا محاصرہ ختم کرانے کے لئے یکجہتی کے نعرے کے ساتھ عالمی کمپین نے غزہ کے عوام سے یکجہتی کے مقصد سے مختلف ملکوں میں پروگراموں کا انعقاد کیا ہے۔ یہ پروگرام ثقافتی نوعیت کے رہے ہیں جن میں غزہ کا محاصرہ ختم کئے جانے کی ضرورت پر تاکید کی گئی ہے اور اعلان کیا گیا ہے کہ اس جنگ زدہ علاقے کا محاصرہ جاری رہنے سے فلسطینیوں کے مسائل و مشکلات میں مسسلسل اضافہ ہو رہا ہے۔ان پروگراموں کے شرکاء نے رفح کی سرحدی گذرگاہ سمیت تمام گذرگاہوں کو کھولے جانے کی ضرورت پر بھی تاکید کی ہے۔ غزہ کا محاصرہ ختم کرانے کے لئے عالمی کمپین نے غزہ کے عوام کی ہمہ جہتی حمایت، سرزمین فلسطین کی مکمل آزادی تک استقامت و پائیداری جاری رکھے جانے، صیہونیوں کا غاصبانہ قبضہ ختم کرانے اور فلسطینی پناہ گزینوں کی وطن واپسی کی ضرورت پر بھی زور دیا ہے۔
پروگراموں کے شرکاء نے عالمی برادری سے مطالبہ کیا ہے کہ وہ غزہ کے فلسطینیوں سے یکجہتی کے لئے اس جنگ زدہ علاقے کا محاصرہ ختم کرانے کی راہ میں پائی جانے والی تمام رکاوٹوں کو دور کرنے کی کوشش کرے۔ واضح رہے کہ دو ہزار سات سے غزہ کا محاصرہ جاری ہے جس کی بناء پر اس علاقے کے پندرہ لاکھ شہریوں کو خوراک، پینے کے صاف پانی اور کپڑوں نیز دواؤں سمیت مختلف قسم کی بنیادی اشیاء کی شدید قلّت کا سامنا ہے جس کی بناء پر اس علاقے میں انسانی بحران کے شدّت اختیار کر جانے کے بارے میں گہری تشویش لاحق ہو گئی ہے۔