غزہ – (فلسطین نیوز۔مرکز اطلاعات) فلسطین کے محصور علاقے غزہ کی پٹی پر اسرائیل کے مسلط کردہ محاصرے کے دس سال کے دوران پہلی بار یورپی ممالک کے سفیروں کا ایک بڑا وفد آج غزہ پہنچ رہا ہے۔ غزہ جانے والے وفد میں 22 یورپی ملکوں کے سفیر شامل ہوں گے۔
فلسطین نیوز کو موصول ہونے والی اطلاعات کے مطابق فلسطینی تعلقات عامہ کونسل کے چیئرمین ناسم نعیم نے بتایا کہ 22 یورپی ملکوں کے دو درجن سفیروں کا وفد غزہ کی پٹی کا دورہ کرنے والا پہلا وفد ہے۔ یورپی سفارت کاروں کا وفد شمالی غزہ کی پٹی میں ’’ایریز‘‘ گذرگاہ سے غزہ داخل ہو گا۔انہوں نے بتایا کہ یورپی وفد کے دورے کا مقصد غزہ کی پٹی میں موجود معاشی بحران اور جنگ کی تباہی کاریوں کا جائزہ لینے کے ساتھ ساتھ بحالی اور تعمیر نو کے کاموں کا جائزہ لینا ہے۔
خیال رہے کہ سنہ 2007ء میں غزہ کی پٹٰی پر اسرائیل کی طرف سے مسلط کی گئی معاشی پابندیوں کے بعد یورپی ملکوں کا یہ پہلا بڑا وفد ہے جو غزہ کا دورہ کر رہا ہے۔
حال ہی میں سوئٹزلینڈ کے سفیر نے متعدد دیگر سفارت کاروں کے ہمراہ غزہ کی پٹی کا دورہ کیا تھا۔