غزہ میں نسل کشی کے خلاف مغربی رائے عامہ بدل رہی ہے، لاعلمی کا عذر باقی نہیں رہا: آئرش مصنفہ

غزہ – (روزنامہ قدس ـ آنلائن خبر رساں ادارہ) آئرش مصنفہ اسٹیفنی چیس نے اس بات پر زور دیا ہے کہ برطانیہ، ریاستہائے متحدہ امریکہ اور دیگر مغربی ممالک میں ابھرنے والی ایک نئی نسل غزہ میں مسلسل جاری صیہونی نسل کشی پر خاموش رہنے یا آنکھیں موندنے کو یکسر مسترد کر چکی ہے۔ انہوں نے اشارہ کیا کہ فلسطین کے ساتھ یکجہتی اب صرف نوجوانوں اور کارکناں کی حدوں کو عبور کر کے مختلف عمروں اور سماجی طبقات تک پھیل چکی ہے، جو دنیا بھر کی آنکھوں کے سامنے ہونے والے اس حشر کے خلاف اپنے موقف کو ایک اخلاقی اور انسانی ذمہ داری سمجھتی ہے۔

آئرش اخبار "دی آئرش نیوز” میں پیر کے روز شائع ہونے والے اپنے مضمون میں چیس نے لکھا کہ نئی نسلیں، بالخصوص ‘ملینیئلز’ اور ‘جنریشن زی’ (Gen Z)، ایک ایسی کھلی اور باہم مربوط دنیا میں جوان ہوئی ہیں جہاں معلومات اور خونی مناظر کی آمد بلا رکاوٹ اور بے مثال انداز میں جاری ہے،یہی وجہ ہے کہ غزہ میں ڈھائے جانے والے مظالم کو نظر انداز کرنے کی دلیل دینا یا وہاں کے حالات سے لا علمی کا بہانہ بنانا اب پہلے سے کہیں زیادہ ناممکن ہو چکا ہے۔

انہوں نے مزید کہا کہ غزہ میں خونریز قتلِ عام اور تباھی کے مناظر سمارٹ فونز اور سوشل میڈیا کے ذریعے عام انسان تک براہِ راست پہنچ رہے ہیں حتیٰ کہ بعض روایتی مغربی ذرائع ابلاغ کی بلیک آؤٹ اور محدود کوریج کے باوجودجس کے باعث نئی نسلیں حکومتی اور سرکاری بیانیے سے آزاد ہو کر فلسطینی تنازعے کی خونی تاریخ اور اس کی باریک تفصیلات تک رسائی حاصل کر چکی ہیں۔

فنون لطیفہ کا جرات مندانہ موقف اور دباؤ کا مقابلہ

آئرش مصنفہ نے ان ثقافتی اور فنکارانہ شخصیات کے جرات مندانہ موقف پر روشنی ڈالی جنہوں نے فلسطینی مظلومیت کے حق میں آواز اٹھائی، جن میں نامور آئرش ناول نگار سالی رونی اور امریکی ریپر میکلمور شامل ہیں، جنہیں اسرائیلی جارحیت کی مخالفت پر شدید انتقامی کارروائیوں اور دباؤ کا سامنا کرنا پڑا۔

انہوں نے اشارہ کیا کہ رونی نے سنہ 2025ء میں اپنی کتب سے حاصل ہونے والی آمدنی "فلسطین ایکشن” نامی تنظیم کو عطیہ کرنے کا اعلان کیا تھا، جس کے بعد برطانوی حکومت نے انسدادِ دہشت گردی کے قوانین کے تحت اس تنظیم پر پابندی عائد کر دی تھی۔ اس انسانی موقف کے پاداش میں رونی پر برطانیہ میں داخلے کی پابندیاں لگائی گئیں اور بعض لائبریریوں سے ان کے ناول ہٹا دیے گئے۔

چیس کا ماننا ہے کہ کسی عام امدادی ادارے کے بجائے رونی کا اس تنظیم کی حمایت کا انتخاب برطانوی حکومت کے ان جابرانہ ہتھکنڈوں پر روشنی ڈالتا ہے جو وہ فلسطینی یکجہتی اور احتجاجی تحرکات کو کچلنے کے لیے استعمال کر رہی ہے۔

مضمون میں امریکی ریپر میکلمور کو برطانوی فنکار ایڈ شیران (Ed Sheeran) کے میوزک ٹور سے الگ کیے جانے کا بھی ذکر کیا گیا، جب انہوں نے اپنے ایک کنسرٹ کے دوران فلسطین کی حمایت میں نعرے لگائے تھے۔ یہ قدم امریکی اسٹیڈیمز کے مالکان، بشمول صیہونی حامی ارب پتی روبرٹ کرافٹ کے شدید دباؤ کے بعد اٹھایا گیا تھا۔

مصنفہ نے مزید کہا کہ ایڈ شیران کو بھی اس معاملے پر غیر جانبدار یا درمیانی راہ اپنانے کی کوشش پر شدید تنقید کا سامنا کرنا پڑا، کیونکہ غزہ کے شہداء کے خون کے سامنے واضح موقف سے گریز کرنا اب مغربی عوام کے وسیع طبقے میں شدید غصے اور استحقار کو جنم دے رہا ہے۔

یکجہتی نسلوں کی حدیں عبور کر چکی ہے

اسٹیفنی چیس نے اس بات پر زور دیا کہ فلسطین کے ساتھ اس عالمی یکجہتی کو محض ایک عارضی لہر یا نوجوانوں کا نیا فیشن قرار دینا مغربی معاشروں میں اس تحریک کی گہرائی کو نظر انداز کرنے کے مترادف ہے۔ انہوں نے وضاحت کی کہ مظاہروں میں شریک، فلسطینی کوفیہ پہنے اور فلسطینی پرچم اٹھائے یہ لوگ کوئی حاشیے پر پڑا اقلیتی طبقہ نہیں ہیں جیسا کہ سیاسی و ابلاغی حلقے دکھانے کی ناکام کوشش کرتے ہیں۔

انہوں نے نشاندہی کی کہ فلسطین کی حمایت میں اٹھنے والی یہ لہر اب کسی مخصوص عمر تک محدود نہیں رہی۔ انہوں نے ‘فلسطین ایکشن’ کے مظاہروں کے دوران معذوروں کی چیئرز پر بیٹھے بزرگوں اور مذہبی پیشواؤوں کی گرفتاریوں کا حوالہ دیتے ہوئے کہا کہ یہ چیز صیہونی پالیسیوں کو مسترد کرنے والے متنوع سماجی و عمری طبقات کی شرکت کو عکاس کرتی ہے۔

آئرش کالم نگار کا ماننا ہے کہ برطانوی اور امریکی حکومتیں فلسطین کے حق میں اٹھنے والی ان آوازوں کو ایک محدود دائرے میں بند کرنے اور ان شخصیات کو مستثنیٰ کیسز بنا کر پیش کرنے کی کوشش کر رہی ہیں تاکہ اس عالمی یکجہتی کے دائرے کو پھیلنے سے روکا جا سکے۔

اپنے مضمون کے اختتام میں، چیس نے سخت ترین الفاظ میں انتباہ کیا کہ آنے والی نسلیں ان تمام لوگوں کا کڑا محاسبہ کریں گی جنہوں نے غزہ کے حشر سے آنکھیں چرانے کا انتخاب کیا۔ انہوں نے سوال اٹھایا کہ یہ کیسے ممکن ہوا کہ دنیا کے پاس ان تمام جرائم کو دستاویز کرنے والی تصاویر اور معلومات کا انبار موجود تھا، لیکن اس کے باوجود انسانوں کے پاس اس خونریز تماشے کو روکنے کے لیے ادنیٰ درجے کی جرات اور رحم دلی باقی نہ رہی؟

یہ مضمون، مصنفہ کے طرَح کردہ نکات کے مطابق، فلسطین کے ساتھ مغربی یکجہتی کے مزاج میں ایک بڑے تاریخی موڑ کو عکاس کرتا ہے—ایک ایسی تحریک جو اب صرف نوجوانوں کے احتجاج تک محدود نہیں رہی، بلکہ تمام تر پابندیوں اور تضییق کے باوجود ثقافتی، فنکارانہ اور وسیع سماجی طبقات کے ضمیر کو جھنجھوڑ چکی ہے۔