غزہ – (روزنامہ قدس – آنلائن خبر رساں ادارہ) غزہ کی پٹی میں جنگ بندی معاہدے کی قابض اسرائیلی خلاف ورزیاں جاری ہیں، جن میں فائرنگ، توپ خانے کی گولہ باری، سرحدی علاقوں کو نشانہ بنانا اور متعدد علاقوں میں عمارتوں اور تنصیبات کو دھماکے سے اڑانے کے عمل کا تسلسل شامل ہے، جس کے نتیجے میں شہداء اور متعدد افراد زخمی ہو گئے۔
یہ معاہدہ اپنے 351 ویں دن میں داخل ہو چکا ہے، جبکہ غزہ کی پٹی کے مختلف علاقے فائرنگ، روشنی والے بموں اور اسرائیلی عسکری گاڑیوں کی نقل و حرکت کی زد میں رہے، ان خلاف ورزیوں کے نتیجے میں انسانی اور میدانی اثرات کا سلسلہ جاری رہا۔ فیلڈ رپورٹس غزہ کی پٹی کے مختلف حصوں میں بمباری، فائرنگ اور عمارتوں کو اڑانے کے عمل کی مسلسل خلاف ورزیوں کی تصدیق کرتی ہیں۔
تازہ ترین پیش رفت کے مطابق مرکز اطلاعات فلسطین کے نامہ نگار نے اطلاع دی ہے کہ غزہ کی پٹی کے وسط میں واقع قصبے زوایدہ کے مغرب میں اسرائیلی ڈرون کے حملے میں ایک شہری شہید اور کئی دیگر زخمی ہو گئے۔
اسی طرح غزہ کی پٹی کے جنوب میں واقع شہر خان یونس کے علاقے مواصی میں جامعہ اقصی کے مغرب میں اسرائیلی ڈرون کے حملے کے نتیجے میں ایک شہری شہید اور متعدد زخمی ہو گئے۔
ہمارے نامہ نگار نے بتایا کہ جنوبی غزہ کی پٹی میں شہر خان یونس کے علاقے مواصی میں جامعہ اقصی کے مغرب میں وجدان کیمپ کے قریب اسرائیلی ڈرون کے براہ راست حملے کے نتیجے میں ایک شہید کے اعضا برآمد کر لیے گئے۔
غزہ کی پٹی کے وسط میں واقع قصبے زوایدہ کے علاقے سوارح میں ایک خیمے کو نشانہ بنانے والے اسرائیلی حملے کے نتیجے میں کئی شہری زخمی ہو گئے۔
اسرائیلی ڈرون نے سوارح کے علاقے پر دو میزائلوں سے حملہ کیا، جبکہ قابض اسرائیلی عسکری گاڑیوں نے وسطی غزہ کی پٹی میں البریج کیمپ کے شمال اور شمال مشرق میں اندادھا فائرنگ کی۔
شہر غزہ میں قابض اسرائیلی گاڑیوں کی فائرنگ سے شہر کے شمال مغرب کے علاقے نشانہ بنے، جبکہ اسی دوران شہر کے مشرق میں جنگی ہیلی کاپٹروں کی طرف سے بھی فائرنگ کی گئی۔
جنوبی غزہ میں اسرائیلی توپ خانہ نے خان یونس کے جنوبی علاقوں پر گولہ باری کی، جبکہ اسرائیلی عسکری گاڑیوں نے شہر کے جنوب اور مشرق میں شدید فائرنگ کی، اور اس کے ساتھ ہی خان یونس کے مشرق میں جنگی ہیلی کاپٹروں کی طرف سے دوبارہ فائرنگ کا سلسلہ بھی جاری رہا۔
اس کے علاوہ قابض افواج نے سرحد سے متصل علاقوں میں جاری فوجی نقل و حرکت کے دوران خان یونس کے شمال میں واقع قصبے قرارہ کے مشرق میں روشنی والے بم پھینکے۔
طبی ذرائع نے اطلاع دی تھی کہ غزہ کی پٹی کے مختلف علاقوں میں اسرائیلی خلاف ورزیوں اور بمباری کے تسلسل کے نتیجے میں ایک بچی سمیت چار شہری شہید ہو گئے۔
وزارت صحت غزہ کی روزانہ کی رپورٹ کے مطابق غزہ کی پٹی کے ہسپتالوں نے گذشتہ چوبیس گھنٹوں کے دوران پانچ شہداء وصول کیے، جن میں زخموں کی تاب نہ لاتے ہوئے شہید ہونے والا ایک شخص بھی شامل ہے، جبکہ اس کے ساتھ 35 افراد زخمی بھی ہوئے۔
سات اکتوبر سنہ 2025ء کو جنگ بندی شروع ہونے کے بعد سے شہداء کی تعداد بڑھ کر 1408 ہو گئی ہے، جبکہ زخمیوں کی تعداد 4916 تک پہنچ گئی ہے، اس کے علاوہ 834 لاشیں بھی نکالی گئی ہیں۔
غزہ کی پٹی کے خلاف قابض اسرائیل کی جارحیت کے آغاز یعنی سات اکتوبر سنہ 2023ء سے لے کر اب تک کی آخری طبی رپورٹ کے مطابق مجموعی تعداد 73,928 شہداء اور 175,030 زخمیوں تک پہنچ چکی ہے۔
یہ خلاف ورزیاں ایسے وقت میں جاری ہیں جب غزہ کی پٹی کے وسیع و عریض علاقے اب بھی تباہی، نقل مکانی اور ابتر انسانی حالات کے اثرات جھیل رہے ہیں، جبکہ جنگ بندی کا معاہدہ نافذ العمل ہونے کے باوجود سویلین آبادی بمباری اور فائرنگ کے خطرات کا سامنا کر رہی ہے۔
