غزہ میں اسرائیلی حملوں کا سلسلہ جاری، مزید تین فلسطینی شہید

 غزہ (روزنامہ قدس ـ آنلائن خبر رساں ادارہ) قابض اسرائیلی فوج کی جانب سے جمعرات کی شام سے غزہ کی پٹی کے مختلف علاقوں میں فائرنگ اور گولہ باری کا سلسلہ جاری ہے، جس کے نتیجے میں ایک نوجوان سمیت مزید تین فلسطینی شہید ہوگئے۔ شہید ہونے والے نوجوان نے ناصر میڈیکل کمپلیکس پر اسرائیلی حملے میں زخمی ہونے کے بعد دم توڑا۔

اسرائیلی فوجی حملوں کے دوران متعدد دیگر فلسطینی بھی زخمی ہوئے ہیں۔

مقامی ذرائع کے مطابق 45 سالہ اکرم سعدی حسنین کو غزہ شہر کے مشرقی علاقے التفاح محلے کے مشرق میں قابض اسرائیلی فوج نے گولیاں مار کر شہید کردیا۔

ذرائع نے بتایا کہ اسرائیل کی پشت پناہی سے کام کرنے والے مسلح گروہوں نے اسرائیلی فوج کی سرپرستی اور فائرنگ کی آڑ میں علاقے میں دراندازی کی۔

جمعرات اور جمعے کی درمیانی شب نصف شب سے کچھ دیر قبل جنوبی غزہ کے شہر خان یونس کے علاقے المواصی میں اسرائیلی ڈرون حملے کے نتیجے میں 36 سالہ رمزی نبیل رمضان ابو طعیم شہید جبکہ تین دیگر فلسطینی زخمی ہوگئے۔

دریں اثنا 20 سالہ محمد ایاد الجزار جمعرات کی صبح خان یونس میں ناصر میڈیکل کمپلیکس پر اسرائیلی بمباری کے نتیجے میں لگنے والے زخموں کی تاب نہ لاتے ہوئے شہید ہوگئے۔

خان یونس میں اسرائیلی فائرنگ کا سلسلہ جاری

ایک الگ حملے میں المواصی کے علاقے میں اسرائیلی فوج کی فائرنگ سے ایک فلسطینی زخمی ہوگیا۔

اسرائیلی فوجی گاڑیوں نے خان یونس کے شمال مشرقی علاقے میں شدید فائرنگ کی، جبکہ شہر کے وسطی اور مغربی حصوں میں فلسطینیوں کے گھروں اور المواصی میں بے گھر خاندانوں کے خیموں کی جانب بھی فائرنگ جاری رہی۔

جنوبی غزہ میں خان یونس کے ساحل کے قریب اسرائیلی بحریہ کے جنگی جہازوں نے سمندر میں گولے بھی داغے۔

جمعرات کے اسرائیلی حملوں میں 12 فلسطینی شہید

تازہ شہادتیں جمعرات کو غزہ کی پٹی کے مختلف علاقوں میں اسرائیلی حملوں کے سلسلے کے بعد سامنے آئی ہیں، جن میں مجموعی طور پر 12 فلسطینی شہید ہوئے تھے۔ ان میں سے چھ فلسطینی خان یونس کے ناصر میڈیکل کمپلیکس پر حملے میں شہید ہوئے۔

قابض اسرائیلی فوج غزہ کے مختلف علاقوں میں مسلسل حملے کر رہی ہے، جن کے نتیجے میں مزید فلسطینی شہید اور زخمی ہورہے ہیں۔ یہ حملے پہلے ہی بڑے پیمانے پر بے گھر ہونے والے اور شدید انسانی بحران سے دوچار شہریوں کی زندگیوں کے لیے مزید خطرات پیدا کر رہے ہیں۔