غزہ – (روزنامہ قدس ـ آنلائن خبر رساں ادارہ) قابض اسرائیلی فوج نے غزہ کی پٹی کے مختلف علاقوں میں توپ خانے سے گولہ باری اور فائرنگ کے واقعات کے ذریعے جنگ بندی کی خلاف ورزی کا سلسلہ جاری رکھا، جس کے نتیجے میں چھ فلسطینی شہید اور متعدد زخمی ہو گئے۔
ہمارے نامہ نگار نے اطلاع دی ہے کہ غزہ شہر کے مغرب میں العباس چوک کے قریب ایک گاڑی پر اسرائیلی ڈرون کے حملے میں محمد الفیومی شہید اور تین دیگر افراد زخمی ہو گئے۔
نامہ نگار نے مزید بتایا کہ پٹی کے وسط میں نصیرات کیمپ میں ’ارض الحلو‘ کے قریب شہریوں کے ایک گروپ کو اسرائیلی ڈرون کے ذریعے نشانہ بنایا گیا، جس کے نتیجے میں دو شہری، جن میں ایک خاتون بھی شامل ہے شہید اور دیگر زخمی ہوئے۔ شہداء کی شناخت اسامہ ولید دیب محارب (عمر36 سال) اور سندس فرح محمد محارب (24 سال) کے طور پر ہوئی ہے۔
اس کے علاوہ دیر البلح شہر کے مشرق میں قابض فوج کی فائرنگ سے نوجوان محمد ابو خماش شہید ہو گئے۔
ادھر مقامی ذرائع نے اطلاع دی ہے کہ خان یونس کیمپ کے علاقے الحاوز میں اسرائیلی بمباری کے نتیجے میں چھبیس سالہ صبح یحییٰ سعید حمدان اور 23 سالہ عبداللہ سلیمان ابو یوسف شہید اور متعدد دیگر زخمی ہو گئے۔
ایک اور مقامی ذریعے کا کہنا ہے کہ قابض فوج کے کواڈ کاپٹر ڈرون اور عسکری گاڑیوں نے غزہ شہر کے مشرقی محلے حی التفاح کی جانب شدید فائرنگ کی، جس کے ساتھ ساتھ توپ خانے سے گولہ باری بھی کی گئی۔ اس دوران قابض فوج نے شہر کے مشرقی حصے میں عمارتوں کو دھماکوں سے اڑانے کا سلسلہ جاری رکھا۔
قابض فوج نے شدید فائرنگ کے درمیان حی التفاح میں نام نہاد ’یلو زون‘ کے رقبے کو وسیع کر دیا ہے، جس کے باعث وہاں موجود متعدد خاندان محصور ہو کر رہ گئے ہیں۔
عینی شاہدین کے مطابق قابض فوج کے ٹینکوں نے پٹی کے وسط میں واقع البریج کیمپ کے شمال مشرق میں شدید فائرنگ کی، جبکہ اسرائیلی بحریہ کی کشتیوں نے خان یونس کے ساحل کی جانب گولیاں برسائیں۔
قابض اسرائیل کی افواج غزہ کی پٹی میں فضائی اور توپ خانے سے بمباری کے ذریعے جنگ بندی کے معاہدے کی مسلسل خلاف ورزی کر رہی ہیں۔ یہ کارروائیاں پناہ گزینوں کے مراکز، نام نہاد ’یلو لائن‘ کے اندر تباہ کاریوں اور اشیاء خوردونوش، امدادی سامان اور سفر پر عائد پابندیوں کے ساتھ جاری ہیں۔
وزارت صحت فلسطین کے اعداد و شمار کے مطابق دس اکتوبر سنہ 2025ء کو شروع ہونے والی جنگ بندی کے بعد سے اب تک شہداء کی تعداد 1094 ہو چکی ہے، جبکہ 3507 افراد زخمی ہوئے ہیں اور 799 لاشیں نکالی گئی ہیں۔
سات اکتوبر سنہ 2023ء سے جاری جارحیت کے نتیجے میں مجموعی طور پر تقریباً 73120 فلسطینی شہید اور 173615 زخمی ہو چکے ہیں، جو کہ پٹی پر قابض اسرائیل کی مسلسل جارحیت کی بھاری انسانی قیمت کا منہ بولتا ثبوت ہے۔
