غزہ – (روزنامہ قدس ـ آنلائن خبر رساں ادارہ) قابض اسرائیل کی حکام نے بدھ کی شام غزہ کی پٹی سے تعلق رکھنے والے تین اسیران کو رہا کر دیا ہے جنہیں سات اکتوبر سنہ 2023ء کے بعد گرفتار کیا گیا تھا۔ یہ رہائی غزہ کی پٹی کے جنوب میں واقع کرم ابو سالم کراسنگ کے ذریعے عمل میں آئی۔
ہمارے نامہ نگار نے اطلاع دی ہے کہ رہا ہونے والے اسیران کو ریڈ کراس کی ٹیموں کی نگرانی میں طبی امداد کے لیے براہِ راست غزہ کی پٹی کے وسطی شہر دیر البلح میں واقع شہداء الاقصیٰ ہسپتال منتقل کیا گیا۔
دوسری جانب ریڈ کراس نے اس بات کی تصدیق کی ہے کہ انہوں نے اسرائیلی عقوبت خانوں سے تین قیدیوں کی رہائی کے عمل میں سہولت فراہم کی ہے اور وہ طبی نگہداشت مکمل کرنے کے لیے شہداء الاقصیٰ ہسپتال پہنچ چکے ہیں۔
ہمارے نامہ نگار کے مطابق رہا ہونے والے اسیران کے نام درج ذیل ہیں: علاء عید محمد حمد (43 سال)، عمر محمد ابراہیم ابو سیف (35 سال) اور سلیمان سعود سلیمان ابو شلوف (25 سال)۔
ان تین اسیران کی رہائی ایک ایسے وقت میں ہوئی ہے جب غزہ کی پٹی کے بڑی تعداد میں قیدی اب بھی قابض اسرائیل کی حراست میں ہیں جنہیں سات اکتوبر سنہ 2023ء سے جاری اسرائیلی جنگ کے دوران گرفتار کیا گیا تھا۔
فلسطینی اور بین الاقوامی انسانی حقوق کی تنظیمیں غزہ سے تعلق رکھنے والے قیدیوں کی حالت زار کو منظرِ عام پر لانے کا مطالبہ مسلسل جاری رکھے ہوئے ہیں، کیونکہ سامنے آنے والی شہادتوں اور رپورٹس میں اسرائیلی عقوبت خانوں اور حراستی مراکز کے اندر قیدیوں کو درپیش انتہائی مشکل حالات اور ان پر ہونے والے مظالم کا ذکر کیا گیا ہے۔
قابض فوج نے اکتوبر سنہ 2023ء سے غزہ کی پٹی پر ایک وسیع جنگ مسلط کر رکھی ہے، جس کے نتیجے میں ہزاروں افراد شہید اور زخمی ہوئے جبکہ انفراسٹرکچر اور شہری سہولیات کو بڑے پیمانے پر تباہی کا سامنا کرنا پڑا۔
غزہ میں وزارت صحت کے اعداد و شمار کے مطابق گذشتہ گیارہ اکتوبر کو جنگ بندی کے بعد سے شہداء کی تعداد 997 اور زخمیوں کی تعداد 3152 تک پہنچ چکی ہے، اس کے علاوہ غزہ کی پٹی کے مختلف علاقوں سے 784 شہداء کی لاشیں بھی نکالی گئی ہیں۔
