نیویارک – (روزنامہ قدس ـ آنلائن خبر رساں ادارہ) پاکستان نے کہا ہے کہ مشرقِ وسطیٰ میں عدم استحکام کی بنیادی وجہ مسئلہ فلسطین ہے۔
اقوام متحدہ میں پاکستان کے مستقل مندوب عاصم افتخار نے کہا کہ اسرائیلی قبضے کا خاتمہ اور دو ریاستی حل ہی خطے میں پائیدار امن کا واحد راستہ ہے، غزہ میں جنگ بندی کے باوجود اسرائیلی حملوں میں 800 سے زائد فلسطینی شہید ہوئے۔
عاصم افتخار نے مطالبہ کیا کہ غزہ امن منصوبے کے دوسرے مرحلے کو جلد مکمل کیا جائے، مغربی کنارے میں آباد کاروں کا تشدد اور غیر قانونی بستیوں کی توسیع تشویشناک ہے، اسرائیل کے امتیازی اقدامات نسلی امتیاز پر مبنی نظام کو مضبوط کر رہے ہیں۔
پاکستانی مستقل مندوب کا کہنا ہے کہ مسجد اقصیٰ میں جاری در اندازیوں اور مقدس مقامات کی پامالی فوری بند کی جائے، لبنان میں اسرائیلی فوجی کارروائیوں سے 2 ہزار سے زائد شہری ہلاک وزخمی ہوئے۔
انہوں نے مزید کہا کہ شام کی خود مختاری، وحدت اور علاقائی سالمیت کا مکمل احترام کیا جائے۔
