غزہ – (روزنامہ قدس ـ آنلائن خبر رساں ادارہ) اسلامی تحریک مزاحمت ’حماس‘ نے اس بات پر زور دیا ہے کہ قابض اسرائیلی فوج کی طرف سے غزہ بندرگاہ پر شہریوں کے خلاف کیا جانے والا نیا قتل عام جارحیت کا تسلسل اور ایک خونریز اور ارادی اشتعال انگیزی ہے، جو اس امر کو بے نقاب کرتی ہے کہ بنجمن نتنياهو کی حکومت اپنے جرائم جاری رکھنے اور جنگ بندی کے معاہدے کو سبوتاژ کرنے پر بضد ہے۔
غزہ میں وزارت صحت نے اطلاع دی کہ منگل کی شام شہر کے مغرب میں واقع غزہ کی بندرگاہ کے اندر ایک کیفے کو نشانہ بنا کر قابض اسرائیل کے ڈرون کی طرف سے کیے گئے حملے کے نتیجے میں ایک بچے سمیت چھ شہری شہید اور چودہ دیگر زخمی ہو گئے۔
حماس نے اپنے جاری کردہ ایک پریس بیان میں کہا کہ نتنياهو ان جرائم کے ذریعے جنگ بندی کو مستحکم کرنے اور معاہدے کو عملی جامہ پہنانے کی کوششوں کو کمزور کرنا چاہتا ہے۔
بیان میں مزید کہا گیا کہ اس حملے کا وقت جو قاہرہ کی حالیہ ملاقاتوں اور ثالثوں کی طرف سے کی جانے والی کوششوں کے فوراً بعد آیا ہے، اس بات کی غمازی کرتا ہے کہ نیتن نتنياهو دانستہ طور پر مذاکراتی عمل کو ناکام بنانے اور صدر ڈونلڈ ٹرمپ کے منصوبے اور شرم الشيخ معاہدے کے نفاذ کو آگے بڑھانے والی علاقائی اور بین الاقوامی کوششوں کو ملیامیٹ کرنے کے درپے ہے۔
حماس نے اس بات پر زور دیا کہ شہریوں کو نشانہ بنانا کشیدگی کو روکنے اور خطے میں امن و استحکام قائم کرنے کی تمام کوششوں کو کھلا چیلنج ہے، یہ اس بات کا ثبوت ہے کہ قابض حکومت جنگ بندی کو مستحکم کرنے اور طے پانے والے امور کو لاگو کرنے کی مساعی کو یکسر مسترد کرتی ہے۔
دوسری جانب ’حماس‘ نے اس معاہدے کو کامیاب بنانے کے لیے اپنی سنجیدگی اور ذمہ داری کا اعادہ کیا، اور اس بات کی طرف اشارہ کیا کہ امریکی ایلچی جیرڈ کشنر اور ثالثوں کے ساتھ ہونے والی حالیہ ملاقاتوں کے دوران بھی یہی سنجیدگی دکھائی گئی تھی۔
تحریک نے امریکی انتظامیہ، ثالثوں اور ضمانت دینے والے فریقوں سے پرزور مطالبہ کیا کہ وہ قابض حکومت کو اس بات کا پابند کریں کہ وہ طے شدہ معاہدوں پر عمل کرے، اپنے جرائم اور اشتعال انگیزی کو روکے، اور بنجمن نتنياهو کو شرم الشيخ معاہدے کو نقصان پہنچانے اور اس کے نفاذ کو روکنے سے باز رکھے۔
