غزہ کے قبائلی اتحاد کا نیشنل کمیٹی برائے انتظامِ غزہ کو فعال کرنے کا مطالبہ

غزہ – (روزنامہ قدس ـ آنلائن خبر رساں ادارہ) فلسطینی قبائل، عشائر اور خاندانوں کے قومی اتحاد کے سربراہ علاء الدین العکلوک نے مطالبہ کیا ہے کہ ’نیشنل کمیٹی برائے انتظام غزہ‘ کو فوری طور پر غزہ میں اپنے کام کا آغاز کرنے کے لیے بااختیار بنایا جائے۔ انہوں نے اس بات پر زور دیا کہ سرکاری ایمرجنسی کمیٹی کے تحلیل ہونے کے بعد اب اس میں تاخیر کی ”کوئی گنجائش باقی نہیں رہی۔“

العکلوک کے یہ بیانات سرکاری ورکنگ کمیٹی کے استعفے کے اعلان اور ’نیشنل کمیٹی برائے انتظام غزہ‘ کو انتظامی ذمہ داریاں منتقل کرنے کی تیاریوں کی تکمیل کے بعد سامنے آئے ہیں۔ یہ کمیٹی ’کونسل برائے امن‘ سے نکلی ہے اور فی الحال مصری دارالحکومت قاہرہ میں موجود ہے۔

غزہ کی پٹی کے وسطی علاقے دیر البلح میں شہداء الاقصیٰ ہسپتال کے باہر پریس کانفرنس کے دوران العکلوک نے کہا کہ ”انتظامی منتقلی کی راہ میں حائل جن رکاوٹوں کا ذکر کیا جاتا تھا، وہ اب ختم ہو چکی ہیں“، اور انہوں نے انادولو ایجنسی کے مطابق، کمیٹی کو جلد از جلد اپنے فرائض سنبھالنے کے لیے بااختیار بنانے کا مطالبہ کیا۔

انہوں نے وضاحت کی کہ اتحاد نے کمیٹی کے قیام کے وقت سے ہی اس کی مکمل حمایت کا اعلان کیا تھا اور وہ اس کے کام کو کامیاب بنانے اور غزہ میں فلسطینیوں کی خدمت کے لیے ہر ممکن تعاون کے لیے تیار ہے۔

انہوں نے نشاندہی کی کہ اتحاد کو ذمہ داریوں کی منتقلی کے عمل کی تفصیلات کے اعلان کے لیے خصوصی کانفرنس کا انتظار ہے، اور امید ظاہر کی کہ کمیٹی فوری اور براہ راست اپنا کام شروع کر دے گی۔

انہوں نے مزید کہا کہ حکومت نے ذمہ داریاں سونپ کر قبائل اور فلسطینی دھڑوں کو یہ ”تحفہ“ دیا ہے، اور اس اقدام کے بعد ان فریقوں کے پاس کوئی جواز باقی نہیں رہا جو انتظام کی منتقلی میں رکاوٹوں کا دعویٰ کرتے تھے۔

العکلوک نے اس بات پر زور دیا کہ نیشنل کمیٹی کو اپنے فرائض سنبھالنے کے لیے بااختیار بنایا جائے تاکہ غزہ میں فلسطینیوں کی تکالیف کو کم کیا جا سکے۔ انہوں نے کہا کہ ”عوام نے بہت کچھ برداشت کیا ہے، اب ایک ایسے نئے مرحلے کے آغاز کا وقت آ گیا ہے جو ان کے حالات کو بہتر بنانے میں معاون ہو۔“

حکومت کے تحلیل ہونے کے بعد، ’نیشنل کمیٹی برائے انتظام غزہ‘ کے سربراہ علی شعث نے اعلان کیا کہ ان کی کمیٹی کام کے لیے ضروری سہولیات اور اختیارات ملتے ہی قومی ذمہ داریاں سنبھالنے کے لیے تیار ہے۔

’نیشنل کمیٹی برائے انتظام غزہ‘ ایک عبوری ٹیکنوکریٹک ادارہ ہے جسے اقوام متحدہ کی سلامتی کونسل کی قرارداد نمبر 2803 اور امریکی صدر ڈونلڈ ٹرمپ کے 20 نکاتی منصوبے کے تحت تشکیل دیا گیا ہے۔ اس کمیٹی نے 15 جنوری سنہ 2026ء کو مصری دارالحکومت قاہرہ میں اپنا افتتاحی اجلاس منعقد کیا تھا۔

اجلاس کے دوران کمیٹی نے اعلان کیا تھا کہ وہ فلسطینی اتھارٹی کے اصلاحاتی پروگرام کی تکمیل تک غزہ کی پٹی میں سول اور داخلی سکیورٹی کے امور سنبھالنے، استحکام، بحالی اور تعمیر نو کی نگرانی کے لیے اپنی مدت کا آغاز کر رہی ہے۔

تاہم، اسرائیلی خلاف ورزیوں کے تسلسل کے باعث کمیٹی نے غزہ کی پٹی کے اندر سے اپنا کام شروع نہیں کیا، اور نہ ہی اس جانب سے یا اسرائیلی جانب سے اس کے غزہ میں داخل نہ ہونے کی وجوہات پر کوئی وضاحت سامنے آئی ہے۔

غزہ کی پٹی 8 اکتوبر سنہ 2023ء سے اسرائیل کی جانب سے کی جانے والی نسل کشی کے نتیجے میں وسیع پیمانے پر تباہی کا سامنا کر رہی ہے، جس کے نتیجے میں 73 ہزار سے زائد فلسطینی شہید اور 1 لاکھ 73 ہزار سے زائد زخمی ہو چکے ہیں، جبکہ پٹی کے تقریباً 91 فیصد انفراسٹرکچر کو تباہ کیا جا چکا ہے۔