غزہ کی وزارتِ داخلہ کا شہریوں سے امن و امان برقرار رکھنے میں تعاون کا مطالبہ

غزہ – (روزنامہ قدس ـ آنلائن خبر رساں ادارہ) غزہ میں وزارت داخلہ اور قومی سکیورٹی نے غزہ کی پٹی میں سماجی یکجہتی اور انتشار کی علامتوں کے خلاف عوامی مزاحمت کو سراہتے ہوئے اسے قابض اسرائیل کی نسل کشی کی جنگ اور داخلی استحکام کو متزلزل کرنے کی کوششوں کے خلاف ایک مضبوط ڈھال قرار دیا ہے۔

وزارت داخلہ نے ایک بیان میں کہا ہے کہ پولیس کا ڈائریکٹوریٹ جنرل، سکیورٹی اداروں کے تعاون سے انتشار کو پھیلنے سے روکنے کے لیے بھرپور کوششیں کر رہا ہے۔ بیان میں نشاندہی کی گئی کہ ان کوششوں کے دوران پولیس اور سکیورٹی ادارے اپنے کئی اہم کمانڈروں، افسران اور اہلکاروں کی قربانیاں دے چکے ہیں جنہیں قابض فوج نے داخلی سکیورٹی برقرار رکھنے اور عوامی امن کے تحفظ کے فرائض کی انجام دہی کے دوران جان بوجھ کر نشانہ بنایا۔

وزارت داخلہ نے غزہ گورنری کے پولیس چیف، شمالی غزہ گورنری کے پولیس چیف، وسطی گورنری میں داخلی سکیورٹی کے سربراہ، جبالیہ کیمپ کے پولیس سنٹر کے سربراہ اور ان کے کئی افسران کے قتل کا ذکر کرتے ہوئے اس بات پر زور دیا کہ یہ پولیس اور سکیورٹی اداروں کے خلاف جاری اسرائیلی جرائم کا حصہ ہے۔

وزارت نے غزہ کی پٹی میں موجود فلسطینی عوام، خاندانوں اور قبائل کو دعوت دی کہ وہ جنگ کے مسلط کردہ حالات میں اپنی ذمہ داریوں کو سمجھیں اور قومی مفاد کو ترجیح دیں، ایسے وقت میں جب قابض دشمن اپنی جارحیت جاری رکھے ہوئے ہے اور بیس لاکھ سے زائد فلسطینیوں کو پٹی کے نصف سے بھی کم رقبے پر محصور کر رکھا ہے۔

وزارت نے اس بات پر زور دیا کہ خاندان اور قبائل معاشرتی تانے بانے کو برقرار رکھنے اور ایسے رویوں کو محدود کرنے کے قابل ہیں جو تنازعات کے بڑھنے کا باعث بن سکتے ہیں۔ انہوں نے عقل سے کام لینے اور ایسے جھگڑوں یا اختلافات کے پیچھے نہ لگنے کی اپیل کی جو خاندانی کشیدگی اور ہتھیاروں کے استعمال کی طرف لے جا سکتے ہیں۔

وزارت نے سختی سے کہا کہ خاندانی جھگڑوں کے دوران ہتھیاروں کا استعمال اور فائرنگ ایک سنگین جرم ہے کیونکہ اس کے نتیجے میں انسانی جانوں کا ضیاع ہوتا ہے اور شہریوں میں خوف و ہراس پھیلتا ہے۔ انہوں نے یقین دلایا کہ سکیورٹی اور پولیس ادارے فائرنگ کرنے والوں کے خلاف قانونی کارروائی کریں گے جس میں استعمال ہونے والے ہتھیاروں کی مستقل ضبطی بھی شامل ہے۔

وزارت داخلہ نے کہا کہ وہ معاشرے میں انتشار پھیلانے کی کسی بھی کوشش کی اجازت نہیں دے گی اور قبائلی عناصر، قومی اور سماجی قوتوں کو دعوت دی کہ وہ تعاون کو فروغ دیں، رواداری کی ثقافت عام کریں، تشدد کو مسترد کریں اور سماجی امن اور اقدار کا تحفظ کریں۔

وزارت نے تصدیق کی کہ متعلقہ ادارے جرائم کے وقوع پذیر ہوتے ہی تحقیقات کر رہے ہیں تاکہ مرتکب افراد کو انصاف کے کٹہرے میں لایا جا سکے، یہ قانون کی حکمرانی کو مستحکم کرنے اور معاشرے کے تحفظ کے لیے ان کی مستقل پالیسی ہے۔

وزارت نے اپنے بیان کا اختتام فلسطینی عوام کی حفاظت اور قابض دشمن اور اس کے آلہ کاروں کی سازشوں کو ناکام بنانے کی دعا پر کیا۔