غزہ -(روزنامہ قدس ـ آنلائن خبر رساں ادارہ) غزہ کی پٹی میں وزارتِ صحت نے ہفتے کے روز اعلان کیا ہے کہ اسرائیلی جارحیت کے تسلسل کے باعث گذشتہ 24 گھنٹوں کے دوران 8 شہداء اور 20 زخمی ہسپتالوں میں لائے گئے ہیں۔
وزارت نے اپنی روزانہ کی رپورٹ میں واضح کیا کہ ہسپتالوں میں لائے جانے والے شہداء میں 6 نئے شہداء، ایک پرانے زخموں کی تاب نہ لا کر شہید ہونے والا نوجوان، اور ایک ایسی لاش شامل ہے جسے ملبے سے نکالا گیا ہے۔
وزارت نے تصدیق کی کہ سات اکتوبر 2023ء سے جاری اسرائیلی جارحیت کے نتیجے میں مجموعی شہداء کی تعداد 73,051 اور زخمیوں کی تعداد 173,437 تک پہنچ گئی ہے۔
وزارت نے مزید بتایا کہ گزشتہ 11 اکتوبر کو جنگ بندی کے نفاذ کے بعد سے اب تک 1,038 افراد شہید اور 3,329 زخمی ہو چکے ہیں، جبکہ متعلقہ ٹیمیں اس عرصے کے دوران 786 لاشیں نکالنے میں کامیاب ہوئی ہیں۔
وزارت نے نشاندہی کی کہ بہت سے متاثرین ابھی تک ملبے تلے اور سڑکوں پر پڑے ہیں، کیونکہ زمینی حالات کی وجہ سے ایمبولینس اور شہری دفاع کی ٹیمیں ان تک پہنچنے سے قاصر ہیں۔
