غزہ – (روزنامہ قدس ـ آنلائن خبر رساں ادارہ) غزہ کی پٹی میں انسانی المیے کی گہرائی کو بیان کرنے والا منظر اب محض اسرائیلی بمباری یا ادویات کی کمی تک محدود نہیں رہا بلکہ اب یہ خطرہ ان ذرائع تک پھیل چکا ہے جو زندگی بچانے کے لیے ناگزیر ہیں۔
انجن آئل اور اسپیئر پارٹس کی شدید قلت کے باعث ایمبولینس گاڑیاں اور شہری دفاع کا عملہ مکمل مفلوج ہونے کے خطرے سے دوچار ہے کیونکہ قابض اسرائیل نے ان اشیاء کو دوہرے استعمال کی فہرست میں شامل کر کے ان کی فراہمی پر سخت پابندیاں عائد کر رکھی ہیں۔
غیر مثالی اقدامات
ایک امدادی مرکز میں پیرا میڈک محمود مقداد ایک ساکن کھڑی گاڑی کے سامنے خاموشی سے اس کے انجن کا جائزہ لے رہے ہیں اور پھر اس کے کچھ حصے الگ کرنے لگتے ہیں۔
یہ منظر اب کوئی غیر معمولی بات نہیں رہی بلکہ ایک روزمرہ کا معمول بن چکا ہے تاکہ کسی طرح دوسری گاڑیوں کو چلنے کے قابل رکھا جا سکے۔
مقداد کہتے ہیں: ہم اب ایک کھڑی گاڑی سے پرزے نکال کر دوسری گاڑی چلاتے ہیں، کبھی کبھی تو ایک گاڑی کا بچا ہوا تیل نکال کر دوسری میں ڈال دیتے ہیں۔ ہم جانتے ہیں کہ یہ عارضی حل ہیں لیکن ہمارے پاس اس کے علاوہ کوئی چارہ نہیں۔
یہ بحران محض ایک تکنیکی مسئلہ نہیں بلکہ صحت اور امدادی شعبے کو طویل عرصے سے نشانہ بنانے کے صہیونی سلسلے کا حصہ ہے۔
غزہ میں سرکاری میڈیا آفس کے اعداد و شمار کے مطابق سنہ 2025ء کے اختتام تک 211 ایمبولینس گاڑیوں اور شہری دفاع کی 23 گاڑیوں کو حملوں کا نشانہ بنایا گیا جس نے اس پورے نظام کو انتہائی کمزور کر دیا۔
اپریل کا مہینہ شروع ہوتے ہی انجن آئل، ہائیڈرولک مواد اور فلٹرز ختم ہونے کی وجہ سے درجنوں گاڑیاں رک گئی ہیں۔ غزہ مرکز برائے انسانی حقوق نے اس بات کی تصدیق کی ہے کہ موجودہ حل محض پیوند کاری ہیں جو کام کے تسلسل کی ضمانت نہیں دے سکتے۔
عام حالات میں انجن آئل ایک مقررہ شیڈول کے تحت بدلا جاتا ہے لیکن مقداد بتاتے ہیں کہ اب یہ اصول قصہ پارینہ بن چکے ہیں: ہم انجن آئل کو اس کی میعاد سے کئی گنا زیادہ استعمال کر رہے ہیں۔ انجن کسی تحفظ کے بغیر کام کر رہا ہے، جیسے وہ خون کے بغیر چل رہا ہو۔
وہ مزید کہتے ہیں: اب انجنوں سے عجیب آوازیں آنے لگی ہیں، درجہ حرارت بڑھ رہا ہے اور کارکردگی گر رہی ہے۔ یہ اس بات کی واضح علامت ہے کہ انجن اندر سے ختم ہو رہے ہیں جو کسی بھی وقت اچانک بند ہو سکتے ہیں۔
دوہرا خطرہ
انجنوں کی یہ خاموش تباہی عملے کو دوہرے خطرے میں ڈال دیتی ہے: ایک طرف قابض اسرائیل کی براہ راست نشانہ بازی اور دوسری طرف بچاؤ مشن کے دوران گاڑی کے اچانک خراب ہو جانے کا ڈر۔
مقداد کہتے ہیں: تصور کریں کہ ایک زخمی کو ہسپتال منتقل کرتے ہوئے ایمبولینس راستے میں رک جائے۔ ہمارے ساتھ ایسا کئی بار ہو چکا ہے۔
وہ مزید کہتے ہیں: ہمارے کام میں ہر ایک منٹ زندگی اور موت کا فیصلہ کر سکتا ہے۔ کسی بھی تاخیر کا مطلب محض ایک نمبر کا ضائع ہونا نہیں بلکہ ایک جیتے جاگتے انسان کی جان جانا ہے۔
دوسری جانب وزارت صحت کے وسطی علاقے کے شعبہ ایمبولینس کے ڈائریکٹر عبد المجید العطار کا کہنا ہے کہ مسلسل دباؤ اور آئل و فلٹرز کی کمی کے باعث آپریشنل تیاریوں میں شدید کمی آئی ہے۔
انہوں نے ایک پریس بیان میں بتایا کہ فعال گاڑیوں کی تعداد 10 سے کم ہو کر صرف 3 رہ گئی ہے جو کہ کم از کم ضروریات کو بھی پورا نہیں کرتیں۔
العطار کہتے ہیں: ہم گاڑیوں کے مکمل خراب ہونے کے ڈر سے ان کی نقل و حرکت کم کرنے پر مجبور ہیں جس کی وجہ سے رسپانس ٹائم (جائے وقوعہ پر پہنچنے کا وقت) آدھے گھنٹے سے بڑھ کر بعض اوقات دو گھنٹے تک پہنچ گیا ہے۔
یہ بحران صرف ایمبولینس گاڑیوں تک محدود نہیں بلکہ ہسپتالوں تک پھیل چکا ہے جو روزانہ کئی گھنٹوں تک جنریٹروں پر انحصار کرتے ہیں۔ ان جنریٹروں کو بھی مسلسل دیکھ بھال اور انجن آئل کی ضرورت ہوتی ہے جو اب دستیاب نہیں۔
اس حوالے سے غزہ مرکز برائے انسانی حقوق نے ناصر طبی مجمع میں ایک بڑے جنریٹر کے بند ہونے کی نشاندہی کی ہے جس کے بعد کم صلاحیت والے جنریٹروں کو محدود گھنٹوں کے لیے چلایا جا رہا ہے۔ اس سے انتہائی نگہداشت کے وارڈز (آئی سی یو) اور آپریشن تھیٹرز جیسے حساس شعبہ جات کو شدید خطرہ لاحق ہو گیا ہے۔
سروسز کے تعطل کا خطرہ
اسی تناظر میں سرکاری میڈیا آفس کے ڈائریکٹر جنرل اسماعیل الثوابتہ نے کہا کہ صحت کا شعبہ اور ایمبولینس سروسز انجن آئل، فلٹرز اور بنیادی آپریٹنگ مواد کی شدید قلت کے سنگین چیلنج کا سامنا کر رہے ہیں جس سے زندگی بچانے والی خدمات کی فراہمی براہ راست خطرے میں ہے۔
انہوں نے ہمارے نامہ نگار سے بات کرتے ہوئے کہا کہ اس کمی کے برقرار رہنے اور باقاعدہ سپلائی نہ ہونے کی صورت میں صحت کے ادارے جزوی یا مکمل طور پر بند ہونے کے دہانے پر ہیں، جبکہ زخمیوں اور نازک کیسز کی بڑھتی ہوئی تعداد کی وجہ سے نظام پر پہلے ہی غیر معمولی دباؤ ہے۔
الثوابتہ نے وضاحت کی کہ ایمبولینس گاڑیاں، بجلی کے جنریٹر اور طبی آلات کی کارکردگی کا دارومدار انجن آئل کی دستیابی پر ہے اور اس میں کسی بھی تعطل کے نتیجے میں ہزاروں مریضوں کی زندگیوں پر تباہ کن اثرات مرتب ہوں گے۔
انہوں نے زور دیا کہ متعلقہ حکام نے اس بحران کی سنگینی سے متعلق درجنوں انتباہات جاری کیے ہیں اور مطالبہ کیا کہ انجن آئل اور آپریٹنگ مواد کی بلا تعطل فراہمی کے لیے فوری عالمی مداخلت کی جائے تاکہ صحت کی خدمات کا کم از کم تسلسل برقرار رہ سکے۔
انہوں نے حالات کی ابتری کی تمام تر قانونی اور انسانی ذمہ داری قابض اسرائیل اور متعلقہ عالمی اداروں پر عائد کرتے ہوئے مطالبہ کیا کہ انسانی خدمات کے حامل صحت اور ہنگامی شعبوں کو ہر قسم کی رکاوٹوں سے دور رکھا جائے۔
انہوں نے خبردار کیا کہ فوری اور بنیادی حل کے بغیر اس بحران کا جاری رہنا ایک بڑے انسانی المیے کو جنم دے گا جس سے ہزاروں مریضوں اور زخمیوں کی زندگیاں داؤ پر لگی ہوئی ہیں۔
