السعادہ بلڈنگ کا انہدام، پناہ گاہ اہل غزہ کے لیے قبر بن گئی

غزہ – (روزنامہ قدس ـ آنلائن خبر رساں ادارہ) انسانی حقوق کےلیے کام کرنے والے ادارے ’یورو مانیٹر ‘کے مطابق ’نسانی ضمیر قومی ضمیر سے پہلے ہی دم توڑ چکا ہے‘۔ ان روح فرسا الفاظ کے ساتھ یورو مانیٹر ہیومن رائٹس آبزرویٹری کے سربراہ رامی عبدہ نے غزہ میں واقع السعادہ بلڈنگ کے زمین بوس ہونے کے المناک حادثے پر اپنے دل کی بھڑاس نکالی، یہ ایک ایسے عذاب کدے کی ہولناک تصویر ہے جہاں اب بے بس شہری محض آسمان سے برستی آگ اور بمباری کے خوف ہی میں نہیں جی رہے، بلکہ وہ ان خستہ حال چھتوں کے اچانک گر پڑنے کے بھی مستقل عذاب میں مبتلا ہیں جنہیں انہوں نے اپنی اجڑی ہوئی زندگیوں کے لیے آخری پناہ گاہ سمجھا تھا۔

بدھ کی صبحِ فجر کے وقت غزہ کے مغرب میں واقع صنعتی زون میں بنی یہ چھ منزلہ عمارت اپنے اندر پناہ لینے والے بے در و دیوار مسکین اور بے کس گھرانوں پر آن گری، جو غاصب صہیونی دشمن ریاست کی طرف سے غزہ پر تھوپی گئی اس سفاکانہ اور وحشیانہ نسل کشی کی یلغار میں پہلے ہی ضرب کھا کر شق ہو چکی تھی اور جہاں یہ خونریز کھیل ہنوز پوری درندگی سے جاری ہے۔ اس قیامت خیز حادثے میں کتنی ہی روحیں اجڑ گئیں، لاشیں اور زخمی ملبے تلے دب گئے، جبکہ ہنوز بہت سے بدن اس خاک کے ڈھیر تلے سانسوں کی بھیک مانگ رہے ہیں۔ تازہ ترین دل دہلا دینے والے اعداد و شمار گواہی دیتے ہیں کہ ملبے سے لاشیں نکالنے اور زندوں کو تلاش کرنے کی اس کٹھن گھڑی میں 21 فلسطینی بچے بھی اس المناک موت کا لقمہ بنے ہیں جن کی شہادت کی تصدیق ہو چکی ہے، جبکہ چودہ دیگر انسان لہولہان ہیں۔

پناہ گزینوں کے سروں پر منڈلاتی چھ منزلہ موت

السعادہ بلڈنگ جب بے سر و سامان اور اجڑے ہوئے مکینوں کے لیے آخری آسرا بنی تھی، تب بھی وہ کوئی جائے امن نہ تھی، لیکن جن کے اپنے آشیانے خاک ہو چکے ہوں، ان کے لیے اس بے مہر دنیا میں اس کے سوا کوئی چارہ بھی تو نہ تھا! جنگ کی چکی میں پس کر ادھ موئے ہو جانے والے یہ شکستہ ڈھانچے اب ان خاندانوں کے لیے تن ڈھانپنے کا واحد سہارا ہیں جو کسی محفوظ چھت کی تلاش میں مارے مارے پھر رہے تھے، اس سے پہلے کہ یہ بدنصیب عمارت پل بھر میں راکھ کا ڈھیر بن جاتی اور اس میں پناہ لینے والوں کو ہمیشہ کے لیے اپنی آغوش میں دفن کر ڈالتی۔

یہ عمارت اپنے مکینوں اور اس کے پہلو میں لگی بے آسرا مسافروں کی خیمہ بستی پر قہر بن کر ٹوٹ پڑی۔ادھر شہری دفاع کے جانباز کارکن اور خلوصِ نیت سے سرشار رضاکار اپنی جان ہتھیلی پر رکھ کر اس جائے وقوعہ کی طرف لپکے تاکہ ملبے تلے سسکتے زندوں اور سانس توڑتے اپنوں کو باہر نکال سکیں، مگر اس مقدس مشن کے سامنے وسائل کا فقدان اور بھاری مشینری کی نایابی ایک پہاڑ بن کر حائل ہو گئی، جس نے ان فرشتہ صفت انسانوں کے خالی ہاتھوں کو ہی اس اندھیری جنگ میں وقت کے خلاف لڑنے والا پہلا اور آخری ہتھیار بنا ڈالا۔

ایک عمارت پر ختم ہونے والا غمِ روزگار نہیں، بلکہ قیامتوں کا سلسلہ

مقبوضہ فلسطینی علاقوں کے انسانی امور کے رابطہ کار رامز الاکبروف نے ان مخدوش، شکستہ اور موت کے منہ میں سسکتی ہوئی عمارتوں میں کسمپرسی کی موت مرنے والے سیکڑوں خاندانوں کے سر پر لٹکتی تلوار پر گہرے رنج و الم کا اظہار کرتے ہوئے خبردار کیا ہے کہ کسی بھی انسان کو محض زندہ رہنے اور سر چھپانے کی پاداش میں موت کے منہ میں دھکیلے جانے کا یہ کھیل کسی صورت قبول نہیں ہونا چاہیے۔

السعادہ بلڈنگ کا یہ ماتم زدہ حادثہ اس عذاب کا صرف ایک باب ہے،شہری دفاع کے دل دہلا دینے والے تخمینے چیخ چیخ کر بتا رہے ہیں کہ غزہ کے طول و عرض میں ایسی کم و بیش دو ہزار خستہ حال اور ہر دم گرنے کو تیار عمارتیں موجود ہیں جن کے بوسیدہ سائے تلے ہزاروں لاچار خاندان اور در در کی ٹھوکریں کھاتے بے گھر انسان کٹی پتنگ کی طرح زندگی گزارنے پر مجبور ہیں اور ان کی سانسیں ان ہی چٹکیوں میں بھربھراتی چھتوں سے بندھی ہیں۔

وہ اس موت کو جانتے تھے.. مگر پناہ گاہ کا نام و نشان نہ تھا

درد کے مارے ہوئے یہ باضمیر لوگ کہتے ہیں کہ اس عمارت کا سانحہ اس تلخ حقیقت سے جدا نہیں کیا جا سکتا جہاں مجبور انسانوں کو یا تو ان شکستہ دیواروں کے سائے میں جینے پر مجبور کیا گیا جو کسی لمحے بھی قبر بن سکتی ہیں، یا پھر ان خیموں کی نذر ہونا پڑتا ہے جو طوفانوں کا مقابلہ نہیں کر سکتے، یا پھر اس بے رحم آسمان کے نیچے کھلے میدان میں چھوڑ دیا جاتا ہے۔

دردِ دل رکھنے والے فلسطینی کارکن خالد صافی نے غم سے نڈھال ہو کر لکھا کہ’ اہل غزہ کی صبح اس ہولناک خبر سے ہوئی کہ چھ منزلیں بے گناہ مہاجروں پر آن ٹوٹی ہیں اور ہمارے پاس اپنے ہی جگر گوشوں کو ملبے سے نکالنے کے لیے ایک بیلچہ اور کدال تک تک میسر نہیں‘۔

ادھر معروف صحافی احمد ابو سلمیہ نے اس عمارت کے دل چیر دینے والے نام اور اس کی تقدیر کے تضاد پر نوحہ کتب کرتے ہوئے کہا کہ اس کا نام «السعادہ» (خوشی) تھا، لیکن یہ درد کا استعارہ بن گئی، کیونکہ یہاں پناہ لینے والے خود جانتے تھے کہ یہ موت کا کنواں ہے، مگر اس کے سوا ان کے پاس کوئی اور چارہ نہ تھا سوائے اس خیمے کے جو خود بے آسرا تھا یا اس کھلے آسمان کے جو ان کے لیے ابوبکر و عمر کی طرح رحیم نہیں رہا تھا۔

موسمِ سرما کی دستک.. اور پھیلا ہوا موت کا سایا

برسات کے بادلوں اور سرد ہواؤں کی آہٹ کے ساتھ ہی ان زخم خوردہ اور جنگ کی دیمک کی کھائی ہوئی عمارتوں کے مزید منہدم ہونے کا ڈر ہر دل کو چیر رہا ہے، خاص کر اس لیے کہ ہزاروں بے کس خاندان اب بھی چھت سے محروم ٹھوکریں کھا رہے ہیں۔ انسانی حقوق کی تنظیمیں مسلسل دہائی دے رہی ہیں کہ یہ بارشیں اور سرد ہوائیں ان زخمی دیواروں کا کلیجہ اور بھی کاٹ دیں گی، اور ایسے میں ان بے سہاروں کو کوئی دوسری پناہ گاہ فراہم کرنا یا انہیں بحفاظت نکالنا ایک کٹھن ترین معمہ بن چکا ہے۔

شہری دفاع اور تمام فلسطینی اداروں نے پکار پکار کر مطالبہ کیا ہے کہ فوری طور پر بھاری مشینری، ملبہ ہٹانے کی جدید مشینیں اور جلانے کا سوختہ ایندھن اس محاصرے میں اتارا جائے تاکہ آخری ہچکی لیتے ان انسانوں تک پہنچا جا سکے جو ملبے تلے دفن ہیں، اور ان کچی عمارتوں کو ڈھانے یا بچانے کا کوئی سامان ہو سکے۔ ادھر فلسطینی دھڑوں نے بھی پوری دنیا کو جھنجھوڑتے ہوئے اس انسانی المیے پر ہنگامی بین الاقوامی مداخلت کی التجا کی ہے۔

خاک کے ڈھیر سے اٹھتا ہوا سوالِ مسلسل

فلسطینی تنظیموں نے دوٹوک انداز میں باور کرایا ہے کہ السعادہ بلڈنگ کا یہ سکتہ خیز انہدام اسی جاری نسل کشی کی وحشت کا تسلسل ہے، اور اگر ان خستہ حال عمارات میں انسانی جانوں کو اس طرح خطرے کے سپرد چھوڑ دیا گیا تو یہ زمین کسی بڑے زلزلے سے کم تباہی نہیں دیکھے گی۔

دوسری طرف اسلامی تحریک مزاحمت ’حماس‘ نے اس المناک سانحے کا پورا پورا بوجھ قابض اسرائیل کے ناپاک کندھوں پر ڈالا ہے، یہ کہتے ہوئے کہ اس ظالم نے ہمارے گھروں کو مسمار کر کے ان اجڑے ہوئے انسانوں کو ان خطرناک اور شکستہ ڈھانچوں میں پناہ لینے پر مجبور کیا، اور پُرزور مطالبہ کیا کہ ملبہ اٹھانے والے آلات فوری طور پر غزہ میں داخل کیے جائیں۔

اسی طرح عوامی محاذ برائے آزادی فلسطین نے اس عمارت کے ملبے تلے دب جانے کو ایک صریح «جرم» قرار دیا، اور ان تمام مخدوش عمارات میں زندگی گزارنے والے باسیوں کی سلامتی کا پرزور مطالبہ کرتے ہوئے مرمت کا سامان اور پناہ کے اسباب فراہم کرنے پر زور دیا، بالخصوص جب سردارِ موسم یعنی سرما اپنی پوری برودت کے ساتھ سر پر پہنچ چکا ہے۔

وہ گھر جو اب جینے کا حق کھو چکے ہیں

غزہ کی اس نگری میں المیہ صرف ان لاشوں پر ختم نہیں ہوتا جو اس ملبے سے نوچ کر نکالی جاتی ہیں، بلکہ یہاں تو ہر شکستہ دیوار کے پیچھے ایک اندھیری موت سسک رہی ہے، اور ہر وہ خاندان جو اس کے اندر جی رہا ہے، وہ آنے والی کسی انہونی کی تاریک گھڑی کا انتظار کر رہا ہے۔ جب رامی عبده اس انسانی بے حسی پر آسمان سے جواب مانگ رہے تھے، تب بھی السعادہ بلڈنگ کا یہ ملبہ اس سچی اور تلخ ترین حقیقت کا گواہ بن کر کھڑا تھا کہ: یہ وہ بدقسمت لوگ ہیں جنہوں نے جنگ کی آگ میں اپنے گھر گنوائے، اور پھر خود کو ایسے شکستہ مکانوں کی پناہ میں دینے پر مجبور ہوئے جو خود ان کے لیے قبرستان بن گئے۔

اور یوں غزہ کی بربادی صرف ان مکینوں تک محدود نہیں رہی جن کے گھر میزائلوں نے توڑے، بلکہ اس دائرے نے ان گھروں کو بھی لپیٹ میں لے لیا جو بظاہر سلامت کھڑے تھے مگر اندر سے مر چکے تھے؛ یہ وہ دیواریں تھیں جو مرہم کی منتظر تھیں، یہ وہ خاندان تھے جو ایک چھت کے بھکاری تھے، یہ آتے ہوئے جاڑے کا روگ تھا، اور یہ وہ ملبہ تھا جس کے سینے میں بے شمار ان کہی کہانیاں دفن تھیں۔