(روز نامہ قدس ۔آنلائن خبر رساں ادارہ) فلسطینی وزارت صحت کے مطابق، گزشتہ 24 گھنٹوں کے دوران غزہ کے مختلف اسپتالوں میں 13 شہداء کے جسد خاکی لائے گئے، جن میں سے 9 کو تباہ شدہ عمارتوں کے ملبے سے نکالا گیا، جبکہ اسرائیلی حملوں میں مزید 4 فلسطینی شہید ہوئے۔ اس کے علاوہ، 16 افراد زخمی ہوئے ہیں۔
روزانہ کی بنیاد پر صیہونی دہشتگردی کے حوالے سے جاری بیان میں وزارت صحت نے تصدیق کی کہ 7 اکتوبر 2023 سے جاری اسرائیلی جارحیت کے نتیجے میں شہداء کی مجموعی تعداد 48,284 تک پہنچ چکی ہے، جبکہ زخمیوں کی تعداد 111,709 ہو گئی ہے، ان شہداء میں 17 ہزار سے زائد بچے اور 13 ہزار سے زائد خواتین شامل ہیں۔
وزارت صحت کا مزید کہنا تھا کہ کئی شہداء اب بھی ملبے تلے اور سڑکوں پر موجود ہیں، لیکن اسرائیلی فورسز کی موجودگی اور تباہ شدہ انفراسٹرکچر کے باعث ایمبولینسز اور ریسکیو ٹیمیں ان تک پہنچنے سے قاصر ہیں۔