(روز نامہ قدس ۔آنلائن خبر رساں ادارہ )قابض صیہونی ریاست میں انتظامی قید جیسے کالے قانون اور جیل حکام کے ناروا رویئے سے پریشان مزید دو فلسطینی قیدیوں نے بھوک ہڑتال کا اعلان کردیا۔
تفصیلات کے مطابق قابض صیہونی حکام کے رویہ سے تنگ آکر بھوک ہڑتال کرنے والے فلسطینی قیدیوں کی تعداد میں اضافہ ہوتا جا رہا ہے۔گزشتہ روز فلسطینی کمیٹی برائے اسیران کی جانب سے جاری ایک بیان میں بتایا گیا کہ اسرائیلی جیل میں قید دو فلسطینی اسیروں ناصر ال جدا اور طاہر ہمدان نے اپنی انتطامی قید کے خلاف بھوک ہڑتال کا آغاز کردیا ہے۔
ذرائع کے مطابق دونوں قیدیوں کا کہنا ہے کہ وہ اپنے مطالبات کی منظوری تک بھوک ہڑتال ختم نہیں کریں گے۔
یاد رہے کہ اسرائیلی جیلوں میں فلسطینی بھوک ہڑتالی قیدیوں کی تعداد اب چھ سے بڑھ کر آٹھ ہو چکی ہے،جس میں سب سے طویل مدت سے بھوک ہڑتال پر بیٹھے ہوئے حزیفہ بھی شامل ہیں جو گزشتہ 49 روز سے بھوک ہڑتال پر ہیں اور انکی حالت تشویش ناک ہو چکی ہے۔