(روز نامہ قدس ۔آنلائن خبر رساں ادارہ )قابض اسرائیلی فوج کی ظالمانہ کارروائیاں جاری،ورک پرمٹ نہ ہونے کے باعث 102 فلسطینی محنت کشوں کو گرفتار کرلیا۔
اسرائیلی میڈیا کے مطابق اسرائیلی فوج نے 102 فلسطینیوں کو اس وقت گرفتار کیا جب وہ مقبوضہ اسرائیلی حدود میں داخل ہونے کے لیے دہیریہ چیک پوسٹ پر پہنچے تھے جو کہ الخلیل شہر کے شمال میں واقع ہے۔
اسرائیلی فوج نے دعویٰ کیا کہ اسرائیلی حدود میں داخل ہوتے وقت ان فلسطینیوں کے پاس کسی بھی قسم کے شناختی کاغذات یا کام کا اجازت نامہ نہیں تھا جس بنا پر ان کو حراست میں لے لیا گیا۔
یاد رہے کہ غزہ میں اسرائیلی درندگی اور مظالم کی وجہ سے امن و امان کی صورت حال انتہائی ابتر ہے اور فلسطینیوں کے لیے روزگار کا حصول بہت مشکل ہوتا جا رہاہے۔ نوکریاں کم ہونے کی وجہ سے اور کاروبار میں مالی مشکلات کا سامنا کرنے کی وجہ سے اکثر فلسطینی اپنی جانوں کو خطرے میں ڈال کر مقبوضہ علاقوں میں حصول روزگار کے لیے چلے جاتے ہیں تا کہ اپنا اور اہل خانہ کا پیٹ بھر سکیں، لیکن صیہونی حکام کسی نہ کسی بات کو بنیاد بنا کر ان کو گرفتار کر لیتے ہیں۔ایک محتاط اندازے کے مطابق اس وقت بھی 500 سے زائد فلسطینی اسرائیلی جیلوں میں شناختی دستاویزات نہ ہونے کی وجہ سے اسیری کی زندگی گزار رہے ہیں۔