(روز نامہ قدس ۔آنلائن خبر رساں ادارہ )قابض اسرائیلی فوج کی جانب سے فلسطینی شہریوں پر بہیمانہ مظالم کا سلسلہ تجاوز کرنے لگا۔مغربی کنارے کے شمال میں واقع شہر طولکرم میں راہ چلتے فلسطینی جوڑے پر اندھا دھند فائرنگ کردی۔شوہر کو زخمی حالت میں ہی حراست میں لے لیا گیا جبکہ بیوی شدید زخمی حالت میں اسپتال منتقل کردی گئی۔
تفصیلات کے مطابق قابض صہیونی فوج نے فلسطین کے مقبوضہ مغربی کنارے کے شمالی شہر طولکرم میں زیتا کے مقام پر فلسطینی میاں بیوی کو راہ چلتے گولیاں مار کر شدید زخمی کردیا ۔
مقامی ذرائع کے مطابق صہیونی فوج نے 25 سالہ یحییٰ ناصر ابو خاطر اور اس کی اہلیہ کو مغربی زیتا میں دیوار فاصل کے قریب اس وقت فائرنگ کر کے زخمی کردیا جب دونوں میاں بیوی اپنی کار میں سوار تھے۔ فائرنگ کے بعد اسرائیلی فوج نے ناصر ابو خاطر کو حراست میں لے لیا ہے جب کہ انکی اہلیہ کو زخمی حالت میں قریبی اسپتال منتقل کیا گیا۔
ذرائع کے مطابق آخری اطلاعات آنے تک زخمی خاتون کی حالت نازک تھی اور ڈاکٹر ان کی زندگی بچانے کے لیے سرتوڑ کوششیں کررہے تھے۔