مقبوضہ بیت المقدس میں ایک اہم یہودی مذہبی راہنما یمئیل جریمیمن نے اتوار کے روزالقدس کے فلسطینی اراکین قانون ساز کونسل کے لگائے گئے احتجاجی کیمپ کا دورہ کیا اور کچھ دیر مظاہرین کے ساتھ رہے. یہودی عالم دین نے مظاہرین سے مکمل یکجہتی کا اظہار کیا.
واضح رہے کہ اسرائیل نے القدس سے تعلق رکھنے والے فلسطینی اراکین قانون ساز کونسل کے تین ارکان اور ایک سابق وزیر کو شہر بدر کرنے کے احکامات جاری کیے ہیں جس کے خلاف انہوں نے گذشتہ سینتالیس روز سے مقبوضہ بیت المقدس میں ریڈ کراس کے دفتر کے باہر احتجاجی کیمپ لگا رکھا ہے.
مرکز اطلاعات فلسطین کے مطابق یمئیل امریکا میں انسانی حقوق بالخصوص پارلیمنٹیرینز کے حقوق کے لیے کام کرنے والی تنظیم کے رکن ہیں. وہ اتوار کے روز ریڈ کراس کے دفتر کے باہر فلسطینی اراکین مجلس قانون ساز کے احتجاجی کیمپ میں گئے.جرمنی کے ایک صحافی بھی ان کے ہمراہ تھے.
اس موقع پر انہوں نےدھمکی یافتہ فلسطینی اراکین قانون ساز کونسل کا موقف سنا اور ان کے اس موقف کی تائید کی کہ اسرائیل کی جانب سے فلسطینی مجلس قانون ساز کے ارکان کی شہر بدری کے احکامات مسلمہ عالمی قوانین کی سنگین خلاف ورزی ہیں.
یہوی مذہبی راہنما نے اپنی تنظیم کے توسط سے فلسطینی مجلس قانون ساز کے ارکان کے حق سکونت کی حمایت کے لیے کوششیں کرنے اور شہربدری رکوانے کا یقین دلایا.