یونان کے ایک پاپ گلوکار اور معروف فنکار میکز تھیوڈر نے اپنی حکومت سے مطالبہ کیا ہے کہ وہ صہیونی وزیراعظم بنجمن نیتن یاھو کو اپنے ملک میں آمد پر گرفتار کر ان کے خلاف جنگی جرائم کے تحت مقدمات چلائے. ان کا کہنا ہے کہ نیتن یاھو اور اسرائیل کی سیاسی اور عسکری قیادت لبنان اور فلسطینی شہر غزہ میں جنگی جرائم میں ملوث ہے، جس پران کے خلاف عالمی عدالتوں میں کارروائی کی جانی چاہیے.
مرکز اطلاعات فلسطین کے مطابق منگل کو سرکاری ٹی وی کو انٹرویو دیتے ہوئے مسٹر میکز تھیوڈر نے کہا کہ امریکا اور اسرائیل کی یہودی تنظیموں کا یونان میں عالمی کانفرنس منعقد کرنے کے لیے آنا ملک کے لیے نہایت خطرناک ہے. انہوں نے اپنی حکومت سے مطالبہ کیا کہ نتین یاھو اگران کے ملک میں آئیں تو انہیں جنگی جرائم میں ملوث ہونے کی بنا پر گرفتار کر کے ان کےخلاف فوجی عدالتوں میں مقدمات چلائے جائیں.
ایک سوال کے جواب میں یونانی پاپ گلوکار کا کہنا تھا کہ عالمی معاشی بحران کے ذمہ دار امریکی یہودی ہیں اور ان کی سازشوں کی وجہ سے دنیا اس وقت اقتصادی بحران سے گذر رہی ہے اور یونان بھی اس سے بری طرح متاثر ہوا ہے.
ایک دوسرے سوال کے جواب میں صہیونیوں پر کڑی نکتہ چینی کرتے ہوئے یونی گلوکار نے کہا کہ جو حشر ہٹلر نے جرمنی میں یہودیوں کا کیا تھا آج اس سے کئی گنا بد تر سلوک یہودی فلسطینیوں کےساتھ روا رکھے ہوئے ہیں.