فلسطینی اتھارٹی کی جانب سے قائم کردہ انسداد کرپشن کمیٹی نے مغربی کنارے میں فتح کی سلام فیاض کی حکومت میں شامل وزیروں اور اہم شخصیات کو کرپٹ قرار دیتے ہوئے انہیں عدالتوں کے ہاں مطلوب قرار دیا ہے. مرکز اطلاعات فلسطین کے مطابق صدرمحمود عباس کی قائم کردہ انسداد کرپشن کمیٹی کے چیئرمین رفیق نتشہ نے ایک غیرملکی نیوزایجنسی کو انٹرویومیں بتایا ہے کہ رام اللہ میں فلسطینی حکومت میں شامل کئی وزراء اوراعلیٰ عہدوں پرتعینات شخصیات کرپشن میں ملوث اورعدالتوں کومطلوب ہیں. ایک سوال کے جواب میں محمد رفیق نتشہ نے کہا کہ وہ تحقیقات کے دوران 50 لاکھ ڈالرزسے زیادہ کی رقوم کرپٹ عناصرسے واپس لےچکے ہیں.انہوں نے تسلیم کیا کہ فلسطینی وزراء کی کرپشن کی تحقیقات بہت مشکل مرحلہ ہے کیونکہ حکومت میں شامل شخصیات سے کرپشن کی تحقیقات میں انہیں مشکل پیش آرہی ہے. انہوں نے سلام فیاض سے مطالبہ کیا کہ وہ کرپشن میں ملوث تمام وزیروں کا تحفظ کرنا چھوڑدیں اورعدالتوں کو مطلوب تمام وزراء کو قانون کے سامنے پیش کیا جائے. ایک دوسرے سوال کے جواب میں رفیق نتشہ نے بتایا کہ بیرون ملک فلسطینی اتھارٹی کے تعینات کئی سرکردہ عہدیداربھی کرپشن میں ملوث ہیں جس سے تحقیقات کے لیے الگ سے کمیٹیاں قائم کی گئی ہیں.