مشرق وسطیٰ کیلئے چین کے نمائندے وو سائیک نے اپنے ملک کی طرف سے پھر ایک بار یہ مطالبہ دہرایا ہے کہ ،غزہ محاصرہ فوری طور پر ختم کیا جائے اور وہاں ابتر ہوئی صورتحال کو بہتر بنانے کے اقدامات کئے جائیں۔ لبنانی صدر مائیکل سلیمان اور وزیراعظم سعد الحریری کے ساتھ بیروت میں ایک مشترکہ پریس کانفرنس سے خطاب کرتے ہوئے، ووسائیک نے فریڈم فلوٹیلا پر اسرائیلی حملے کی بھر پور مذمت کی۔ انہوں نے کہا کہ چین عالمی برادری کے ساتھ مل کر اقوام متحدہ کی قراردادوں پر جلد از جلد عمل کرانے کی کوششوں میں سرگرم عمل ہے۔ سائیک نے کہا کہ چین تمام عرب ممالک سے رابطے کر رہا ہے اور بالخصوص لبنان کے ساتھ رابطے میں ہے کیونکہ ،لبنان سیکیورٹی کونسل کا غیر مستقل ممبر بھی ہے۔ انہوں نے کہا کہ چین خطے میں امن کا خواہاں ہے اور وہ مکمل خود مختار فلسطینی ریاست کیلئے کوشاں ہے۔ انہوں نے واضح کیا کہ خطے میں تب ہی امن اور معاشی استحکام ممکن ہے جب اسرائیل 1967کے مقبوضہ علاقے خالی کرے،اور بیت المقدس میں امن کو پھلنے اور پھولنے کے مواقع فراہم کرے۔